الحاج صاحب البيت

الحاج صاحب البيت راجل متدين و محترم و غايه فى الاخلاق ،بارك الله له و عليه و حواليه،و بعدين يا جماعه قال ايه كان عارض شقته للأيجار بس شرط اللى عاوزه تسكن تقدم المستندات الرسميه و صوره من قسيمه الزواج عشان الحاج مبيسكنش مطلقات لازمن و لابد تكون متزوجه، يعنى البيت زيه زى الاراضى المقدسه،و الله دى حقيقه ، يعنى المطلقه بقى زيها زى اللى عندها انفلونزا الطيور ربنا يعفينا و يعفيكوا،انا بقى مش مشكلتى فى الحاج يعنى ان كان السكن من فضله ملحوقه عليه ، الشقق كتير و الارض ارض الله، بس هو لفت نظرى للحال المؤسف اللى وصل ليه مجتمعنا من عنصريه ونبذ للسيدات المطلقات رغم كل البرامج و حملات التوعيه ، و البرامج بتاعت ترضى تجوزى ابنك لواحده مطلقه ترد السيده الفاضله طبعا امال زيها زى بناتى والله ، مع ان ده مبيحصلش و البيت بيولع حريقه ساعه مايفكر بس الشاب انه يتجوز مطلقه، و اهله يقاطعوه و يمنعوا عنه المعونه و والدته تعيط و تقوله ليه يابنى هو انت فيك عيب ... الى اخره من مهازل،للأسف ده اللى جعل زيجات كتير اوى فاشله تستمر و تتحمل الزوجه جميع انواع المهانه و الاهانه بل و الهوان على رأى الزعيم عشان مينطلقش عليها لقب مطلقه، مع ان الطلاق بيبقى ساعات والله القتل الرحيم لجسد الزواج المهترىء ،ده كل ده عشان مطلقه امال لو طالبه الخلع هايعملوا ايه؟اكيد هيطردوها من البلد رميا بالحجاره ،و كمان و اقولها بكل اسف اهل المطلقات بيكونوا مع المجتمع ضد بنتهم فى كثير من الاحيان و يمنعوها من الخروج و الدخول و يحجبوها عن الانظار كأنها عار لا سمح الله، الغريبه ان دايما الراجل المطلق الناس تقول عليه يا حرام اكيد مراته طلعت عينه، لكن لو ست يقولوا اكيد فى حاجه الموضوع فيه فيل ، الغلط اللى كلنا وقعنا فيه هو التعميم يعنى لو فى واحده او حتى عشره مطلقات مش تمام يبقى الصنف كله مضروب، مع ان تعميم الجزء على الكل كلنا اخدناه فى الفلسفه على انه خطأ جسيم و تاخد عليه صفر كبير فى ورقه الامتحان، عاوزين نفكر بحياديه شويه و بدون عنصريه لو المطلقه دى اختى او بنتى هارضى انها تتعامل المعامله دى او ان الرجاله تنظر ليها نظره ذات مغزى و تصبح فريسه سهله او ان السيدات تسرع بأخفاء ازواجهن عنها كأنها وباء ، و لكل مطلقه ارفعى رأسك العيب مش فيكى العيب فى المجتمع ده حق شرعه ربنا عندما تستحيل العشره ، يا ترى بقى هانغير تفكيرنا او حتى نحاول و لو شويه عشان ربنا يكرمنا و ناخد ان شاء الله حتى واحد من عشره فى امتحان فلسفه الحياه؟؟؟؟؟