فى بيتنا القديم جارتين بيمثلوا صنفين من النساء متناقضين تماما
احب اعرفكم عليهم ، طنط ضعيفه ، و طنط مستقويه، سعدنى الحظ انى اجاورهم
احكيلكم الاول عن طنط ضعيفه
طنط ضعيفه دائما و ابدا على وشها ابتسامه بلهاء ، و بصراحه عمرى مشفتلها سبب ،
مع ان جوزها مطلع عينها ، من ضرب و اهانات و الذى منه ، و ردها المستفز علطول
بيكون ضحكه مستعبطه و تقول :يعنى اعمل ايه
الراجل بصراحه بيعمل اللى يقدر عليه و زياده شويه
و دى مفيش فايده ولا بتنطق
جاتلنا يوم تخبط على الباب فتحت و لقيتلكوا طنط وشها كأنه الطريق الدائرى
ساعه مبتحصل فيه حادثه من ام خمس عربيات دى
و ماشاء الله كله الوان ازرق و احمر و فوشيا و مطبات
طبعا استنتجت ان الفطار كان علقه سخنه
انا : مالك يا طنط ، الحقى يا ماما
طنط و برضه الابتسامه اياها على وشها: ابدا يا حبيبتى ده عمك بس كنت بطلب منه طلب
و طبعا دخلتها و قعدت تحكى لماما و انا مذبهله (من ذهول يعنى)
جوزها بصراحه ابن حلال يعنى مفيش مصروف للبيت ، و لو طلبت يبقى يومها مش معدى
ويا ويلها لو ابدت رأيها فى موضوع قدام ضيوف ،هاتتهزق قدام الناس عشان جوزها مقتنع
ان الستات مالهاش رأى و ان رأيها لازم يكون من رأى جوزها والخ والخ.........
كل ده و طنط برضه بتضحك و انهت كلامها بجملتها المعهوده:يعنى اعمل ايه؟؟؟؟
طبعا كان نفسى اقولها تعمل ايه بس استسلمت لغمزات ماما عشان ماخربش بيت الست
(قال يعنى هو كده عمران) المهم مسكت نفسى بالعافيه
و رجعت طنط لمعتقل جوانتنامو (قصدى بيتها) و هى بتضحك (ربنا مايقطع لها عاده)
اما بقى طنط مستقويه
فطنط بقى صبح وليل و ليل و صبح
بتتخانق مع جوزها يقول كلمه ترد بعشره و رغم انه بيضربها بس هى الشهاده لله مبتسيبش حقها
فى يوم مغيم كده سمعنا صوت ولاد بتعيط و بيخبطوا على الباب
بنفتح لقيناهم ولاد طنط مستقويه و كل الجيران متجمعين
ماما :مالكم يا ولاد فى ايه؟
الولاد:الحقوا ماما هاترمى بابا بأنبوبه البوتجاز
انا سمعت انبوبه من هنا و صرخت بصوت جهورى:هى فيها أنابيب... انبطحووووووووووووووووووووووووووووووا
طبعا بعد اليوم المشهود ده عمو جوز طنط مستقويه دخل الغاز و استغنى عن الانابيب
و كفى الله المؤمنين شر القتال
الحقيقه الاتنين غلط فى تصرفاتهم يعنى الست مش المفروض انها تكون ضعيفه لدرجه الهطل
و تبقى مسلوبه الأراده والرأى كده ،طبعا الطاعه مطلوبه بس مفيش مانع من مناقشه خفيفه لا ضرر منها ولا ضرار
عشان الزوج يحس ان مراته ليها رأى و شخصيه مستقله و عليه احترامها و ان الموجود فى راسها ده عقل مش طبيخ
والا سيستمر فى اهانتها املا فى يوم انها تنطق او تعترض و تحسسه بوجودها و كيانها
لأن الرجل و ان كان بيحب المرأه الرقيقه لكن لا يحب المرأه الضعيفه على طول الخط
يحبها ذكيه تحاوره و تفهمه و تناقشه و ان اختلفوا فلا تفسد للحب قضيه
ولا المفروض ان المرأه تبقى مستقويه
صوتها عالى و على اهبه الاستعداد للمواجهه وواقفه على الواحده
والا سيصبح البيت ساحه للقتال و البقاء فيه محكوم بقانون الغابه للأقوى و الأعنف
فى خيط رفيع اوى بين المرأه قويه الشخصيه و بين المرأه سليطه اللسان
و خيط ارفع بين امرأه مطيعه واخرى ضعيفه الشخصيه
المرأه الذكيه بقى هى اللى تقدر تجمع بين الصفتين و تضيف توابل و تقلل ملح
و تطلعلنا فى الاخر طبخه مظبوطه
بالهنا .......
صح يابسنت
ردحذفالراجل بيحب الست الرقيقة (المستضعفة) مش الضعيفة
طبعا هناك فرق
لانها لما تستضعف دة ذكاء منها فى اوقات معينة انما لو اكتشف انها ضعيفة فعلا هو هيستقوى عليها
بس فى رجالة اصلا ضعيفة ستاتهم هما اللى ممشينهم
وفى رجالة قوية ومفترية
بس انا شايفة ان عينة الرجالة الضعيفة انتشرت بشكل كبير اليومين دول
لان الست زى متقولى كدة زهقت من تسلط الراجل وزهقت من سى السيد
وانكش الفرخة تبئا ديك
ميرسى لمتابعتك يا حبيبتى و حلوه انكش الفرخه دى،يا سلام لو الحياه تبقى حلوه كده من غير ماحد ينكش حد،هو فعلا صحيح الضغط يولد الانفجار، انا اعرف واحده طول عمرها مؤدبه و مش بتتكلم لو جوزها قالها حاجه تزعلها او كلمه رخمه،فضلت ساكته ساكته لحد مابقت بترد بالمثل(بقت ديك) فهو بطل يضايقها بقى ههههههههههه
ردحذفبسنت متميزة كعادتك
ردحذفويا عينى عليكم دى جيرة تقصر العمر بعد الشر عنكم
الست سلاحها ذكائها يعنى تعرف امتى تستكين وامتى تتكلم وامتى ترفض وامتى تقبل يعنى الوقت والطريقة اللى هتتكلمى بيهم هما دول اللى بيخلو الطرف التانى يقبل كلامك ويسمعه ويحترمه
ولو المسالة عضلا كنا كلنا خدنا دروس كارتيه
لا ابدا نو جاميه دى احترام متبادل والا يبقى الحياة لا تطاق
اوعى تخافى من الجواز الناس دى فى الحالتين مش كتير قوى يعنى موجودين اه لكن يفرق كتير الاحترام والوعى دول بيعملو ثنائى افضل
تحياتى ومزيد من التميز
مامه مازن
ردحذفمش هاشكرك على الزياره عشان انتى بقيتى صاحبه مكان خلاص ،لا اخاف ايه انا داخله الموشوع بقلب جامد ههههههههههه ،مش جامد اوى يعنى،بس انا مقتنعه ان طول مانا بعامل جوزى باحترام ده هيخليه يحترمنى اكيد، اما لو بقى ثبت العكس، تبقى يا شماته ابله طازه فيا
ههههههههههههههههههههه
ردحذفلا ربنا ما يجيب شماته ولاغيره
فى حد يزعل الجدعنة والعقل ده كله
ربنا يوفقك يارب
بجد بوست دمه خفيف جدا
ردحذفخرجني من مود سحساوي اللي علق عندي وبيستهين بالحب
يجي يشوف البوست ده
ماهو الناس دي لو كانوا بيحبوا بعض وبيخافوا علي بعض ماكنش يبقا ده حالهم
الست مهما كان شخصيتها قويه لما بتحب رجل صح وبتحس معاه بالحب والحنان والامان خلاص بتستمع بشخصية الانثي الحقيقيه جنبه
شموسه يا قمر ، مانتى ماتتوقعيش من الناس كلها تبقى فى رقتك، نورتينى،عندك حق والله الحب بيهون على الواحد حاجات كتير، مش عارفه ازاى نعيش من غيره،الدنيا بقت بطبيعه الحال قاسيه اوى،بس لما بتلاقى حد بيخاف عليكى و بيديكى حنيه و امان، بيبقى ده كل دنيتك....
ردحذفبوست جامد جداً
ردحذفوأعتقد إن أنا أول رجل يعلق عليه وهذا يجعلني في وش المدفع..
فعلاً الرجل يحب المرآة الرقيقة التي يشعر معاها أنه يتعامل مع كائن مختلف عنه لا مع صديقه!
يحب كذلك الذكية - بس مش عليه- يعني تناقشه بس متبقاش عايزة تمشي كلامها عليه حتى لو صح!
ويحب أن يشعر بأنها تثق فيه إلى أبعد الحدود هذا وحده يجعله خاتماً في إصبعها (قلتلك السر أهو :) )
بوست جميل جداً واستمتعت به وإن شاء الله هتلاقيني ناططلك هنا كتير..
أستأذنك هحط مدونتك عندي في الأقلام الصديقة.. ممكن؟
تحياتي...
ميسره نورتنى و طبعا يشرفنى انك تضيف مدونتى عندك،و احييك على عقلك المتفتح،انا مبسوطه اوى ان فى رجاله زيك بتشاركنى و تعلق على المواضيع عشان اعرف وجهه نظركوا برضه،و سرك فى بييييير ،و اكيد هاعمل بيه ان شاء الله
ردحذفآه يا خوفي يا بدران :)
ردحذفعموماً متقلقيش مش هحرمك من وجهات نظري الممتازة :))
دمتي في تألق :)
بوست رائع بيحكي عموما عن الست المصريه بالذات بس بصراحه أنا شايف الحياه بين الراجل و الست لازم تبقى معتمده على المشاركه مافيش حد فيهم ينفرد بقراراه و يقول هو ده الصح :)
ردحذفانما لازم تدافعوا طبعا عن حقوقكم بس مش زي الست مستقويه ^^ .. و برده لازم الراجل يبقى متفتح و يعتمد على الست في الحياه مايبصلهاش على أساس انها ديكور في البيت أو حاجه هو ممتلكها لازم يحترمها و يحترم قراراتها برده :)
تدوينه رائعه و هاتابعك على طول :)
هيثم الكاشف
ردحذفنورتنى و طبعا يشرفنى متابعتك،عندك حق و ياريت كل الرجاله يفكروا زيك،الحياه الزوجيه مشاركه لا تستقيم بفرد واحد ابدا،شكرا ليك...
أيوه طبعا خير الأمور الوسط .. لا الاٍستسلام المتخاذل الضعيف مطلوب و لا الاٍفترا و الاٍستقواء مطلوب و لكن الوسطيه هى ما تتيح حياه صحيه متوازنه للزوجين و للأطفال كمان ..
ردحذفربنا يهدى الجميع بقدرته و عجبنى تشبيه الطريق الدائرى :))
استاذ عمرو
ردحذفمنور المدونه كالعاده،فعلا انت نبهتنا لحاجه مأخدش باله منها حد ،و هى نفسيه الاولاد اللى بيتربوا فى بيئه متوتره و غير سليمه زى دى،يعنى الخلافات الزوجيه مش بيبقى المتضرر الوحيد منها الزوجين بل بالعكس الاطفال هم اول الخاسرون...
بالتوفيق يا بسنت
ردحذفانترنتاوى
ردحذفسعيده بزيارتك لمدونتى و بتمنالك كل توفيق ان شاء الله
سلام الله عليكم ورحمته وبركاته
ردحذفالزوجة لا بد ان يكون لها شخصيتها طبعا
ولابد يكون لها رأي ايضا
ولازم يكون ليه وجهة نظر في كثير من الامور
وعلى الزوج انه يعطيه كثير من الاهتمام
ويهتم برايها
ويحاول يرضيها ان امكن
بس برده البنت الذكية والفطنة هي اللي تحاول تعرف شخصية زوجها وزي ما هو بيحاول يهتم بيها تهتم بيه
ولو كان في وقت زعلان او متضايق تيجي على نفسها شويه
وقدم السبت هتلاقي الاحد
وعلى فكره هي الحياة ماتنفعش تكون حرب بين الزوج الزوجة
يعني واحد فيهم لازم يغلب
لا طبعا دي تبقى حياة مستحيلة
لابد ان يكون الحب بين الزوجين
والاهتمام متبادل
حب واحترام + طاعة لله سبحانه وتعالى = حياة سعيدة بإذن الله سبحانه وتعالى
وسلام بقى
ابو بدر الدين
ردحذفشرفت مدونتى المتواضعه،عاوزه اقولك الله ينور عليك انت لخصت الموضوع كله فى معادله بسيطه واجبه التنفيذ من الطرفين وليس طرف واحد اكيد،ارجو متكونش اخر مره زياره ولك تحياتى
يا بسنت ده اٍحنا ككبار لما بنفتش داخل نفوسنا بنلاقى عقد و كلاكيع كتيره مترسبه من أيام الطفوله و لذلك بنحاول قدر المستطاع أن نجنب ولادنا هذه العقد و الكلاكيع اللى أثرت علينا أصلا ..
ردحذفطبعا يأتى الأولاد فى مقدمة قائمة ضحايا الخلافات الزوجيه للأسف الشديد ..
تقبلى تحياتى و تقديرى ..
استاذ عمرو
ردحذفشكرا لمرورك و رأيك القيم،الأطفال فعلا هم ضحايا بلا اى ذنب يأتى بهم الوالدين الى الحياه فعلى الاقل فليحرصوا على ان تصبح حياتهم بلا منغصات
خالص تحياتى
أنا معك في اعتراضك على الست الضعيفة وعلى الست المستقوية، فخير الأمور دائماً الوسط
ردحذفلكن لم ألحظ في كلامك استنكاراً شديداً لضرب الجارين لزوجاتهم، وخصوصاً "طنط مستقوية"، فقد ذكرت ضرب زوجها لها عرضياً وكأنه في حالتها يحق له. مع أن في رأيي أنه يحق لها هي أن تستقوي مادام زوجها يضربها باعتبارها الأضعف جسمانياً فهل يجب أن تسكت له؟
ياسمين حميد
ردحذفمنورانى يا حبيبتى و يارب متكونش اخر زياره،العنف ضد المراه مش محتاج منى استنكار لأنه من ابشع صور العنف كما هو معروف،لكن انا فى حاله طنط مستقويه اشرت الى ضعف زوجها و ان كان يضربها فهى دائما من تتخذ دور المهاجم على طول الخط مما يدفعه للرد،طبعا الحياه كفلتلها حق الدفاع عن النفس لكن فى حالتها كانت هى البادئه و لم تحاول اصلاح حياتها او حتى الانفصال مما سبب انهيار فى الاسره و انهيار للأطفال اللى بيواجهوا المعارك دى كل يوم مذعورين
و على الجانب الاخر كان الاولى بطنط ضعيفه انها اللى تدافع عن نفسها و عن العدوان القائم عليها لكنها لم تحرك ساكنا
اشكرك على مرورك و على انك اشرتى الى موضوع مهم كموضوع العنف الاسرى و ان شاء الله هاعمل بوست مستقل عنه
تقبلى تحياتى