السبت، 12 مارس 2011

رجعت تانى

وحشتونى اوى اوى
المدونه كمان وحشتنى
رجعت تانى بس مش جايه لوحدى
شايله جوايا مدونه صغنتوته
يارب مستقبلها يبقى احسن مننا كلنا
و يطلع الجيل الجديد فى حريه و يبقاله صوت مسموع
مش هتكلم عن الاحداث اللى حصلت ولا هتنبأ باللى جاى
انا كتبت من جوايا حاجه يارب تعجبكم
و يارب ميكونش مستوايا قل بعد الجواز هههههههههه
و اكون عند حسن ظنكم
مستنيه ارائكم من تانى زى ماعودتونى

شاطر و مشطور

شاطر و مشطور

شاعر مغمور

قال انا هكتب خاطره

فى ايده كوبايه شاى فتله

ورقه و قلم

حضر و سطر و سمى

وقف القلم على طرف الورقه

اكتب عن ايه مش لاقى فكره

اكتب عن الحصار ؟؟

لا هاكتب عن الثوار

كان فى مره ميدان و خيمه و علم

و قامت ثوره

و بعد الثوره ؟؟

حط القلم و شال القلم

بعد الثوره عربيه فيشار ؟؟

لا لا ده كان قرار

هاطرد فسادى و اعلم ولادى

يقولوا لأ للى ظلم

يقولوا اه للى اتحرم

يقولوا لأ للظابط اللى على الغلبان قبض

و يقولوا لأ للمعجبانى اللى هرب بعد ماقبض

يقولوا لأ للى باع و اللى اشترى

يقولوا لأ ده قفانا ياما اتهرى

و اسكت ليه ماخلاص كوز المحبه اتخرم

و اسكت ازاى ده كان فاضل يبيعوا الهرم

يشيلوا و يحطوا ورث و حطوا ايديهم عليه

قالوا راجل شقيان غفلان مش راح يسأل بكام ولا ليه

بس اتنفضوا ولاد الايه

قالوا انت هنااااااااك رايح فين و بتعمل ايه ؟؟

ده اوانى ولا هاسكت ولا ادارى

غمه و زالت و بردت نارى

ادى شبابى فكوا حصارى

حقى اهو رجع و اخدوا بتارى

قالوا ارحل

قالوا عدل غير حرر

بلدى و عرضى و فيها هاعمر

الجمعة، 18 يونيو 2010

هااااااااااااتجوز




وحشتونى اوى معلش بغيب عنكم
بس برجع و مقدرش استغنى عنكم ابدا
وبحب دايما تشاركونى افراحى
عندى خبرين حلوين طبعا عرفتوا اول واحد
من الفضيحه اللى فى العنوان
هاتجوز ان شاء الله يوم 7/9
ادعولى بالله عليكم
اكون قد المسئوليه
و اعمل بيت جميل و ربنا يقدرنى و اسعد زوجى
و اخليه اسعد راجل فى العالم
و اكون زوجه ناجحه و بيتى حته من الجنه
و هو كمان يحبنى و يشيلنى فى عينيه
وصوه عليا بقى مش انتوا تبع العروسه ولا ايه ؟؟؟
عقبال كل السامعين و اللى اتجوز يعيش فى سعاده و حب
و اللى مخطوب يتجوز
و اللى لسه مش مخطوب يتخطب ان شاء الله
يالا كل اللى عنده نصيحه او دعوه انا مستنيه اسمعكم
و عاوزه اسمع احلى زغروته
نيجى بقى للخبر التانى
ان شاء الله من يوم السبت اللى هو بكره
الموافق 6/19
هايبدأ برنامجى على اذاعه راديو وسط البلد
البرنامج اسمه على الرف
يارب يعجبكم و اكون ضيفه خفيفه عليكم
و ده رابط الراديو

مستنيه كمان ارائكم عن البرنامج
على جروب الراديو على الفيس بوك
ادعولى ربنا يوفقنى
و هاستأذنكم طبعا فى اجازه
هاتجوز و ارجع علطول
المدونه امانه فى رقبتكم
و زى مدونتكم خدوا راحتكم على الاخر
و هاتابع ردودكم و ارد عليها ان شاء الله
استودعكم الله

الأربعاء، 12 مايو 2010

اه بحب نفسى .... فيها حاجه دى ؟؟؟؟



وحشتووووووووووووووونى
و المدونه وحشتنى
بعتذر عن غيابى بس عندى ظروف
استنوا منى اخبار حلوه قريب
موضوع النهارده اللى هاكلمكم عنه
مش موضوع بقدر ما انه قصه
اثرت فيا اوى
و كتيييييييره اوى القصص اللى بتأثر فيا رغم بساطتها
لكن دى بالذات حبيت تشاركونى فيها
عشان اكتشفت الغلطه اللى كلنا بنعملها من غير ما نحس
كنت يوم مسافره و ركبت الاتوبيس
و لقيته زحمه اوى فدرت بعينى يمكن الاقى
كرسى فاضى وصلتله بعد عناء فى نهايه الاتوبيس
اول ما لمحتنى متجهه للكرسى
بسرعه قامت رفيقتى فى الكرسى اللى جمبى
تلملم شنطتها و نفسها و تحاول تفسح ليا مكان
و لقيتها و كأنها تزيل عن نفسها ذنب
تحاول ان تلتصق بالشباك عشان اقعد مرتاحه
استغربت و ابتسمت لذوقها و قعدت
لقيتها بدأت تكلمنى و تتأسف عن وزنها الزائد
و تطلب منى العفو و السماح
و بدأت تحكيلى قصتها
كانت بنوته فى ثانوى مسافره لعمها
و من عمها لتهرب
و تحت تهرب دى حطوا مليوووون خط احمر
الى تركيا
رايحه تعمل عمليه عشان تتخلص من وزنها
قد ايه عينيها دمعت و هى بتحكيلى عن الناس
و عن نظراتهم و الاشفاق و السخريه
اللى ماليه عيونهم
تعليقات تافهه و عقول سطحيه
اضطرتها انها تغامر و تسافر لعمليه فى علم الغيب
و تجازف بأن تجرى امتحاناتها فى السفاره هناك
من الاخر سابتلهم البلد و مشيت
سرحت منها و قلت كلنا بنعمل كده
كلنا بنستخبى بعيوبنا خايفين من الناس
و فكرت
ماتيجى نحب نفسنا
انا كمان هاحب نفسى ،،، فيها حاجه دى ؟؟؟
تعالوا نتباهى بعيوبنا لأننا لا نملك ان نعترض
تعالوا نشكر الله على المحاسن و نترك الكمال لله وحده
البنت دى كانت روحها اجمل من مليون بنت جميله
بس الافكار المشوهه اجبرتها ان تلتحق بركب
الرشيقات الفاتنات بغض النظر عن قيمهم او عقولهم
"اللى بتتمثل فى قلم الروج و احدث صيحه فى الوان الشعر"
و كأن العالم من فرط جماله لم نعد نسمح فيه
بأى شخص يمكن ان يشوه اللوحه الكامله
جميل ان نهتم بصحتنا و مظهرنا
و لكن الاجمل ان نرى فى الناس جمالهم الحقيقى
و احب افكركم بمثل اجنبى
بيقول ان الجمال فى عين ناظره
يعنى لو انت جميل من جواك هاتشوف كل الدنيا جميله
و بديعه فى خلقها و تصويرها
من هنا احب اقولها
انتى جميله بروحك و بكل مافيكى حتى بوزنك الزائد
و اللى شايف غير كده ،،،،، يشرب من البحر
طولت عليكم بس بجد كانت تجربه تستاهل انها متمرش عليا مرور الكرام

الأربعاء، 10 مارس 2010

حلال بره .... حرام جوه

استغربت لحال الرجل الشرقى
و اندهشت اكتر لأزدواجيته الواضحه بشكل صارخ
انا كنت مقدره و مناصره
ولا زلت
ان الراجل قبل مايتجوز بنت
يشترط طبعا ولا مجال للمناقشه انها تكون عذراء
محترمه
على خلق
متدينه اى كان دينها
ان تكون اهلا لتصبح ام لأولاده
ان تصون بيته و ماله و شرفه و غيبته
لو مش محجبه ياريت و يا حبذا لو تتحجب
ميكونش ليها اصحاب ولاد يا سلام يا سلام
عز الطلب
حاضر و نعم مايفارقوش لسانها
كل ده انا مكانش عندى مشكله فيه
خااااااااااالص
من حقه ان يظفر بذات الدين
زى ماوصانا الرسول الكريم
بس المفاجأه بقى ان الكلام ده
فى مصر فقط لا غيييييييييييير
ولو سألت اى شاب
لو بيونسيه او اى مثيله لها طبعا
طلبت تتجوزك توافق ؟؟؟؟
من غير كلام الاجابه هتكون
اى نعم
اللى خلانى اقول كده
انى شفت مثال غريب اوى لرجل مصرى
كان زي اى شاب بيحلم بالسفر و انه يشتغل بره
و الدولار مزغلل عينه
سافر و عجبته بنوته شقرا
و قال يجرب التفاح الامريكانى بدل المصرى ابو جنيه
اتجوزها و تخلى عن مبادئه فى انه يكون اول رجل فى حياتها
الراجل عجبته العيشه و فضل يطنش حاجات كتير
مراته بتلبس عريان .......
ايه يعنى خلينى متحضر
اصل فى اوروبا و الدول المتقدمه عشان نتطور
لازم نقلع
مراته جابت بنتين زى القمر
البنات كبروا ميعرفوش حاجه عن مصر ولا اصلهم الشرقى
و البنوته الكبيره وراها الصغيره
بقى ليهم صاحب
البنات سهرانين مع ولاد للصبح
و ايه يعنى خلينى متحضر ماكل البنات فى سنهم كده
البنات كبروا اكتر و اتخلوا عن اعز ما يملكن
و ايه يعنى دى حاجه رمزيه و دى حريه شخصيه
البنات سابوا البيت و عاشوا مع اصحابهم الشباب
من غير جواز
و ايه يعنى الجواز ده شكليات
و فضل يتنازل يتنازل لحد
صاحبنا ما بقى الخواجه جو
بدل ما كان يوسف المصرى
ليه المبادىء و العادات و التقاليد و الشرف
لا يطبق غير جوه مصر بس
و لما نخرج نقلع احنا كمان عبايتنا
عشان ما نعلى و نعلى و نعلى
هو حرام جوه و حلال بره؟؟؟؟؟؟؟

السبت، 20 فبراير 2010

اول فرحتى



هاحكيلكم النهارده عن بنوته كان عندها 8 سنين
فى يوم من ايام المدرسه كانت حصه العربى
و بالتحديد حصه تعبير
قعدت تكتب و تكتب

و سلمت الكراسه لمدرسه العربى
و عدت ايام
و المدرسه فى اول حصه تعبير نادت عليها
على ورقتها كانت نجمه كبيره قاعده و متربعه
و جمبها اعلى رقم ممكن يحلم بيه تلميذ
رقم 10
و زياده فى الاعجاب من المدرسه
طبعت جمب النجمه كلمه ممتااااااااااز
و قالت للبنوته
لو اديتك هديه تحافظى عليها و تهتمى بيها و كل يوم تراعيها؟؟؟؟
البنوته قالتلها ايوه طبعا
ردت المدرسه
طيب ربنا ادالك هديه حلوه اوى
كلماتك امانه استخدميها فى الخير و حافظى عليها
و اوعى تسيبى القلم من ايديكى بعد كده
و بكره لما تبقى حاجه كبيره اوى افتكرينى
البنوته من يومها و هى بتكتب كل حاجه و اى حاجه
كانت صغنتوته و مكانتش بتعرف تعبر عن احساسها
فكانت بتكتب كل اللى تحس بيه
و حتى بعد ماكبرت و عرفت تعبر و تطلع كل اللى جواها
برضه مسابتش القلم
عشان هى مختارتش الكلمات
الكلمات هى اللى اختارتها
البنوته دى احتفلت يوم الجمعه بأول قصه ليها تشوف النور
فى كتاب شاركها فيه كتير زيها كانت عندهم احلام
البنوته دى
انا
و الكتاب فى المكتبات

الاثنين، 1 فبراير 2010

ناقصه حته

وحشتونى اوى و المدونه وحشتنى
احب اولا اشكر كل الناس اللى سألوا عليا
انا بخير الحمد لله
و الف مبروك لمصرنا الجميله
لفوزها المستحق المشرف و الغير عادى
و يارب دايما متألقه بأولادها
مبسوطه اوى انى مصريه و بعيش على ارضها
.............
موضوع النهارده غريب شويه
مش لأنه محصلش قبل كده
او منتخيلش انه يحصل
لكن لأن الواحد كان فاكر ان المشوار بقى هين
فى طريق زرع احترام المرأه فى نفوس الناس
لكن اول ماقريت عنه
قلت لسه بدررررررررررررررى
عريس فى السعوديه
كاتب كتابه و قضى اجمل ايام الخطوبه مع عروسته
و وقعت فى غرامه و تصورت انه زيها
راسمها فى قلبه و خياله
لحد ماراح يزورها يوم
و لقاها تعبانه شويه و مرهقه
سألها مالك فيكى حاجه ؟؟
قالتله انها تعبت بليل و عملت عمليه الزائده الدوديه
و فجاه راح الحب و الغرام و نسى يقولها كلمه سلامتك
او يطبطب عليها و هى لسه قايمه من عمليه
و قام انتفض و كانها قالتله انها لا قدر الله ..........
و قال لأهلها انا مش هاكمل الجوازه دى
و مضطر اطلقها عشان ............
عشان ناقصه حته
و هو كان عاوز عروسه كامله بجميع اعضائها حتى الزيادات
ايوه زى ماقريتوا
ناقصه حته
مش عارفه ليه تصورت للوهله الاولى انه بيتكلم على عربيه
مش واحده شاركته احلامه و اتكتب اسمها جمب اسمه فى ميثاق غليظ
و اقسم انه يراعى ربنا فيها
كان لسه فى حد بيتعامل مع المرأه على انها بضاعه ضرورى انه يطلع منها كسبان
و يستفاد بكل حته فيها زى ماقال عريسنا ؟؟؟
و كان هو الحقيقه بالجهل الكفايه اللى خلاه يتصور ان الزائده الدوديه
ممكن تكون مرض خطير يورثه الاولاد من امهم
تفتكروا لو كان هو مكانها
كان هايحب ان حد ينظرله نظره نقص و اشمئزاز
و يسيبه و يمشى و هو فى اشد الحاجه الى الحنيه على فراش المرض؟؟؟
انا مش شايفه انها خسرت كتير
بالعكس هى كسبت نفسها بإنذار مبكر
عن شخصيه متستاهلش انه يتقال عليه رجل
لأن كلمه راجل دى كبيره اوى
و معناها اكبر من شويه عنجهيه و تجبر
...........
اشوفكم على خير

الجمعة، 11 ديسمبر 2009

انا ليلى


تضامنا مع حمله كلنا ليلى

انا ليلى
انا فى كل بيت
انا اختك و امك و ابنتك و حبيبتك
انا من ضلعك و فى دمك
و مكانى هو قلبك
انا نصف عالمك الاخر
انا الابتسامه و انا الورده وانا الفرحه
و انا الدمعه
انا انجبتك و علمتك الكلمه و الخطوه
انا عشقتك و انا تزوجتك و انا تحملتك
انا شاركتك فى البأساء و الضراء
و انا ملأت حياتك الموحشه
انا من خلدت ذكرك و نشرت نسلك
فلا تقيدنى و لا تنقصنى لتزيد
لا تقتل طموحى لتنجح و تتألق
اتركنى اضحك و اعيش و احلم
اتركنى انجح و اكد و ابذل
اتركنى اطير و احلق و المع
اتركنى اتنفس