وحشتونى اوى و المدونه وحشتنى
احب اولا اشكر كل الناس اللى سألوا عليا
انا بخير الحمد لله
و الف مبروك لمصرنا الجميله
لفوزها المستحق المشرف و الغير عادى
و يارب دايما متألقه بأولادها
مبسوطه اوى انى مصريه و بعيش على ارضها
.............
موضوع النهارده غريب شويه
مش لأنه محصلش قبل كده
او منتخيلش انه يحصل
لكن لأن الواحد كان فاكر ان المشوار بقى هين
فى طريق زرع احترام المرأه فى نفوس الناس
لكن اول ماقريت عنه
قلت لسه بدررررررررررررررى
عريس فى السعوديه
كاتب كتابه و قضى اجمل ايام الخطوبه مع عروسته
و وقعت فى غرامه و تصورت انه زيها
راسمها فى قلبه و خياله
لحد ماراح يزورها يوم
و لقاها تعبانه شويه و مرهقه
سألها مالك فيكى حاجه ؟؟
قالتله انها تعبت بليل و عملت عمليه الزائده الدوديه
و فجاه راح الحب و الغرام و نسى يقولها كلمه سلامتك
او يطبطب عليها و هى لسه قايمه من عمليه
و قام انتفض و كانها قالتله انها لا قدر الله ..........
و قال لأهلها انا مش هاكمل الجوازه دى
و مضطر اطلقها عشان ............
عشان ناقصه حته
و هو كان عاوز عروسه كامله بجميع اعضائها حتى الزيادات
ايوه زى ماقريتوا
ناقصه حته
مش عارفه ليه تصورت للوهله الاولى انه بيتكلم على عربيه
مش واحده شاركته احلامه و اتكتب اسمها جمب اسمه فى ميثاق غليظ
و اقسم انه يراعى ربنا فيها
كان لسه فى حد بيتعامل مع المرأه على انها بضاعه ضرورى انه يطلع منها كسبان
و يستفاد بكل حته فيها زى ماقال عريسنا ؟؟؟
و كان هو الحقيقه بالجهل الكفايه اللى خلاه يتصور ان الزائده الدوديه
ممكن تكون مرض خطير يورثه الاولاد من امهم
تفتكروا لو كان هو مكانها
كان هايحب ان حد ينظرله نظره نقص و اشمئزاز
و يسيبه و يمشى و هو فى اشد الحاجه الى الحنيه على فراش المرض؟؟؟
انا مش شايفه انها خسرت كتير
بالعكس هى كسبت نفسها بإنذار مبكر
عن شخصيه متستاهلش انه يتقال عليه رجل
لأن كلمه راجل دى كبيره اوى
و معناها اكبر من شويه عنجهيه و تجبر
...........
اشوفكم على خير
مش كل الرجالة كده
ردحذفيااااااااه لسه هنعيش بالدماغ دى
ردحذفلسه فى حد ممكن يفكر كدا اللى يفكر فيها على انها بضاعه يبقى فى اى لحظه هيرميها زى ما حصل كدا وفعلا ابسط حاجه يتخيل نفسه مكانها بصرف النظر انا لموضوع مضحك اصلا بس بجد حاجه غريبه انفى نوع من الرجال منح نفسه سلطه التحكم فى الست على انها زى الشقه او العربيه يغير ويبدل لو حصلها حاجه
طول ماحنا بنفكر كدا عمرنا ما هنوصل ابدا
ربنا يهدى الجميع
بلال
ردحذفشرفتنى و طبعا مش كل الرجاله كده دى قله قليله لسه منغلقه جوه افكار جاهليه نسجها المجتمع عن المرأه
نورت المدونه و تقبل منى خالص التحيات
manoo
ردحذفاشكرك على المرور ، فعلا هو الموضوع مضحك بس بيبكى فى نفس الوقت ان رغم التقدم اللى وصلناله لسه فى ناس مش قادره ترتقى بأفكارها و تكون على قد مستوى النهضه اللى بتحصل فى مجتمعاتنا العربيه
نورتنى و لك منى خالص التقدير
يالهوى
ردحذفو انتى كنتى عايزاه يتجوزها بعد ما بقت ناقصه الحته الزايده
و الله يا بنتى اللى يفكر بالطريقه دى و انها جهاز بيشتريه و لازم يكون احدث موديل و عليه ضمان يا اما يرجعه تبقى هيه اللى كسبانه
آل زايده آل ادى اللى ناقص
زورو مدونتى الجديده
ردحذفالجواز و سنينه
ردحذفنورتينى يا قمر ، اه فعلا كان ناقص يطلب منهم خدمه صيانه 3 سنين من يوم كتب الكتاب ، فعلا هى اللى كسبانه احسن انا مش عارفه الصنف ده بيبقى عامل ازاى بعد الجواز
تحياتى
ايمان محمد
ردحذفنورتينى يا حبيبتى و مبروك المدونه الجديده ، اكيد هازورك قريب
الحمد لله على سلامتك يا بسنت ،لك وحشة كبيرة ، أتمنى تكونى بكل خير
ردحذفبالنسبة للبوست ، فبجد (شر البلية ما يضحك) ، أنا مش قادرة اتصور ،
بس فعلا زى ما قلتى هى اللى كسبانة و الحمد لله إنها اكتشفت عقليته قبل الزواج، لا حول و لا قوة إلا بالله
ربنا يستر على اللى جاى
خالص تحياتى لك
تاثير الفراشه
ردحذفالله يسلمك يا قمر وحشتينى خالص والله ،، هو نموذج مضحك بس فعلا يزعل عشان حسسنا ان لسه بدرى على مانوصل لكل الناس و نغير طريقه تفكيرهم الرجعيه دى ،، يارب اللى جاى يكون احلى و يكون عندنا رجاله بجد تقدر المرأه انها تتطمن على حياتها و نفسها معاهم
تقبلى تحياتى
لا حول ولا قوه الا بالله
ردحذفهل يوجد مثل هذ النوعيه من الرجال فى هذا الزمان ؟
أين تعاليم النبي محمد في التعامل مع المرأه ؟
أين الرحمه والاحسان ؟
أين الشهامه والمروءه ؟
ولكن مثل هذا الرجل لا يستحق مثل هذه المرأه فهو لم يقرأ تعاليم حبيبه محمد .
وماذا كان سيفعل إذا تزوجها وحدثت لها حادثه أدت الي بتر ساقها أو أحدى يداها ؟ هل كان سيطلقها لأنها ( ناقصه حته ) ؟
تقبلي مروري نصيره النساء
محمد البنا
طريق النجاح
محمد البنا
ردحذفنورتنى ،، و بجد مفيش كلام بعد اللى قلته ،، لو بنلتزم بديننا صح اللى نظملنا حياتنا الزوجيه و العمليه و غيرها كنا بقينا من افضل الامم ، ولو كان اختار على اسس نبينا العظيم من دين و خلق و لم يعتمد على المظهر اللى ممكن بسهوله فى اى وقت لا قدر الله يتشوه ، كان عاش حياه سعيده ، لكن للأسف الزواج دلوقتى لناس كتير بقى مصلحه و نوع من التجاره المصغره
تقبل خالص تقديرى و احترامى
مش كل الرجاله كده طبعا بس المقال حلو وبجد اسلوبك ظريف ربنا يوفقك
ردحذفيا رب دايما بخير
ردحذفراجل جاهل
ردحذفبتهرجي
ردحذفصح
لا
بتهرجي
قول لي انك بتهرج
والا هنصاب في اعز مااملك نافوخي
هزرا صح
ده خير اللهم اجعله خير
الحمد لله انها في خبطة واحدة شالت زايدتين
الزائدة الدودية
والزائد الزوجي
ربنا رحمها
صحيح ربنا بيسبب الاسباب
طمنيني عليكي عامله ايه
سلامي
حلوه زى ما تكون نكته مش عارف ليه مكشفش على اسنانها لتكون خلعه ضرس و لا حاجه ربنا يشفى بس ده وضع شاذ قوى امال لو لقاها لا مؤاخذه حامل كان عمل ايه
ردحذفههههههههههههههههههههههههههههههههه
ردحذفمش مصدقه
معقوله فى ناس بتفكر كده
هى الكسبانه طبعا ان ربنا انقذها من واحد بعقليه الجاهليه دى
ياسلام عليكي يا حكيمة حواء
ردحذفرائعة جدا
اسلوبك رائع
اما بالنسبة للموضوع
الرجل هو اللى ناقص حتة
وحتة مهمة جدا
بلا عقل
يعني بلا اعصاب واحساس وتميز
هى زادت حتة
زادت رحمة
دى المفروض تبوس ايديها شعر ودقن :)))
ردحذفربنا كرمها انها بعدت عن شخص بيفكر بالتفكير ده
سوزى
ردحذفلا طبعا مش كل الرجاله كده و الحمد لله ،،، نورتى المدونه يا قمر و ميرسى على الدعوه الجميله
sharm
ردحذفوالله ده ابلغ وصف ،،، المدونه نورت اتمنى متكونش اخر زياره
شموسه الحلوه
ردحذفلا مش بهزر خااااالص ، و عجبنى اوى تعبير الزائده الزوجيه فعلا مكانش له لازمه ،، انا الحمد لله بخير اشكرك على سؤالك
Forty
ردحذفلا و ياخدها حامل ازاى هو اكيد سأل على البضاعه ،،، قصدى على العروسه ،،، عشان ميكونش فيها عيب كده ولا كده زى بواقى التصدير ،،، هو فعلا وضع شاذ و يارب ميتكررش
نورت المدونه و شرفتنى بالمرور
قيس بن الملوح
ردحذفنورتنى و اكيد هازور المدونه قريب ان شاء الله
حلم
ردحذفحكيمه حواء مره واحده ربنا يخليكى ليا يارب ،، هو فى الحاله دى اتفق معاكى انه ناقص احساس ،، و هى زادت شرف ببعده عنها ، بس مش كل الرجاله كده حرام فيه رجاله بجد محترمه و نماذج مشرفه زى والدى ووالدك و ازواجنا و اولادنا ان شاء الله
تقبلى خالص حبى
عايش و لكن
ردحذفنورتنى و اشكرك على مرورك الكريم ، حلوه تبوس ايديها شعر و دقن دى هههههههه ،، بس الحقيقه هو اصلا مش بيفكر من الواضح كده