اولا كل واحد ياخد حته تورته بمناسبه عيد ميلادى ال23
و خلوا بالكوا ان السنه الجايه و اللى بعدها ....و اللى بعدها
ان شاء الله لو ليا عمر هايفضل 23
انا بنبه اهو و عملت اللى عليا
معلش اتأخرت عليكوا و بشكر كل اللى سألوا عليا فى غيابى
زى ماوعدتكوا النهارده اول حلقه من جوه دماغه ... وجوه دماغها
مع هبه ورامى ابطالنا و يارب ينتفع بيها الجميع ان شاء الله
هبه ورامى لسه فى سنه اولى جواز وواحده واحده معانا
هايتعرفوا على بعض و على اختلافتهم
و هانعرف معاهم ازاى نبعد عن المشاكل بقدر الامكان
و تكون اختلافتنا سبب للتقريب بيننا مش للبعد لاقدر الله
بسم الله الرحمن الرحيم
هبه
اخيرا هانتجمع مع العيله من جديد
اول مره من اول ماتجوزنا انا ورامى نخرج مع عيلتنا كلنا
و احس انى و هو بقالنا حياه مستقله
مش عارفه ليه اختاروا مكان بعيد عشان يعملولنا حفله يستقبلونا بيها
بعد مارجعنا من شهر العسل
فرصه بقى واحنا لسه لوحدنا ارغى مع رامى شويه فى موضوع شغلى
هبه : ايه رأيك يا حبيبى انا شايفه بقى ان وقت الدلع خلص ولازم نفكر فى حياتنا بقى شويه
انا بفكر انزل اشوف شغل من تانى عشان مازهقش من قعده البيت وكمان اساعد شويه فى المصاريف
رامى ساكت ومركز فى السواقه
هبه : ايه يا حبيبى انت مش بترد ليه، لو مش موافق قوللى طيب و نتناقش
يا رامى
رامى بعد سكوت طويل : نعم يا هبه
هبه : ده انت مش معايا خالص اللى واخد عقلك ، بقولك عاوزه انزل اشتغل
رامى : بعدين طيب نبقى نتكلم بعدين وهو ده وقته
هبه: و ايه يعنى يا حبيبى وانت يعنى بتعمل ايه ماحنا من ساعه ماطلعنا و انت ساكت
انت زعلان من حاجه و مخبى عليا؟؟؟
رد عليا
رامى: مش زعلان ياستى مفيش حاجه اسكتى بقى شويه
هبه
هو في ايه هو بيعمل معايا كده ليه هو انا قلت حاجه
و بعدين هو ماله عمال يلف فى نفس المكان ليه كده
ده احنا بقالنا اكتر من ساعتين فى طريق ماياخدش اكتر من ساعه
لما اشغل الراديو يسلينى
رامى :اقفلى يا هبه البتاع ده مش عاوز ازعاج
هبه :سيبه يارامى انا زهقانه هو مضايقك فى ايه
رامى بيقفل الراديو و يقول : قوللى حاضر و خلاص
هبه
ايه الخروجه الرخمه دى
هبه :رامى انت وقفت ليه؟؟
رامى : مش عارف شكلى تهت
هبه : طيب استنى لما نسأل حد
رامى : لا مش ضرورى انا عارف المكان بس اتلخبطت
هبه :وماله طيب لما نسأل عشان نتأكد
رامى : لا مش لازم خلاص
هبه : طيب اصبر هاكلم حد من العيله اوصفلهم احنا فين ويقولولنا نوصل ازاى
رامى : هو انتى ليه مش بتسمعى الكلام قلتلك انا عارف ملكيش دعوه بقولك ايه نامى و لما نوصل هاصحيكى
هبه..... جوه دماغها
انا غلطانه اصلا انا بس كنت عاوزه اساعده
عشان ميتضايقش مش عارفه ليه مش طايق كلامى
مع انى كنت عاوزه اسليه و احسسه انى بشاركه
و انى مش متضايقه اننا تايهين
رامى .... جوه دماغه
مش عارف ليه مش مخليانى اركز فى حاجه
و بعدين نسأل حد ليه مانا عارف كل حاجه
هى ليه محسسانى انى مش عارف اتصرف
و انى مستنى مساعده عشان اعمل ابسط الحاجات
خلاويص
انتوا عارفين ايه النقطه هنا اللى كانت غايبه عن هبه
ان معظم الرجاله لما بينشغلوا فى حاجه
زى السواقه مثلا و حاجات تانيه كتير بيدوا كل اهتمامهم للى فى ايديهم
عشان كده مش بيركزوا فى اى حاجه تانيه جانبيه
حتى و ان كان مجرد كلام
بعكس الستات اللى بيقدروا يركزوا فى كذا حاجه مع بعض
فمثلا بنلاقيها فى المطبخ بتعمل كذا حاجه
فى وقت واحد وعينيها مع الاولاد كمان
وعشان كده اختارى الوقت المناسب للكلام
و خصوصا اذا كان الموضوع مهم ومحتاج مناقشه
الحاجه التانيه ان الراجل زى ما شفنا مش بيحب انك تحسسيه
انه مش قادر ينجز ابسط الامور و انه دايما محتاج مساعده
بلاش الاهتمام الزائد خصوصا وقت المشاكل
لأن ده بيفسره الراجل على انه غير جدير بتحمل المسئوليه
على عكس مانتى تقصدى طبعا وهو انك بتشاركيه وتقدميله دعم
المره الجايه لما تكونوا مثلا تايهين فى الطريق
اقفلى الراديو عشان يركز و متتكلميش
و سيبيه وهو هايحلها بمعرفته فى دقايق
و ده طبعا بينطبقى على مواقف كتير فى حياتنا
و دى كانت اختلافات النهارده
يارب تعجبكوا
اول زياره للمدونه
ردحذفان شاء الله مش الاخيره
البوست جااامد
وكلامك صح
*تحياتي
دنيا
ردحذفنورتينى يا قمر ، الحمدلله ان البوست عجبك ،مستنياكى تتابعينى بأرائك
تقبلى تحياتى
اولا حمد الله بالسلامه
ردحذفثانيا انا بقى باختلف معاكي
ليه
انا معاكي اه ان الرجاله ما بيعرفوش يركزوا فى اكتر من حاجه
بس بناءا على الحديث الى انتى بنتيه هنا
الاخ ده قليل الذوق ومش بيتكلم زي البنى ادمين
يعنى حتى لو كان مركز فى حاجه فى حاجه اسمعها معلش يا حبيبتى نتكلم بعدين عشان انا سايق ومش باعرف اتكلم وانا سايق
كمان فكرة انها تنسحب فى المشاكل البسيطه عشان الخضنفر يحس بنفسه دي برضه مش عجباني
الحياه اصلها مشاركه ومش من الطبيعى انه يحس ان هو كل حاجه وهى ولا حاجه
لا طبعا مش معنى انها ادخلت فى موقف انه قاصر او عاجز عنه ولكن كل واحد بيأدي دوره
كان المفروض يقبل كلامها بصدر رحب اكتر من كده شويه
تحياتي ليكى
ودايما منوره البلوج
نورتينى يا جميل رأيك تمام طبعا بس انا مكانش قصدى ان لما تبقى فى مشكله تنسحب لا بالعكس تحسسه بالمسانده بس من غير ماتتدخل بزياده و على فكره الكلام هنا لو كانت مشكله تخصه مثلا فى الشغل او خلافه لكن لو مشكله تخص البيت اكيد رأيها لازم يكون بجانب رأيه لأن دى حاجه مشتركه بينهم
ردحذفميرسى على مشاركتك
بجد بحد حلوة وعندك حق فعلا ده تفسير الست وده تفسير الرجل والموقف ده بالذات انا نفسي مريت به وخدت وقت على ما فهمت ليه الراجل مش بيحب يسال حد لما يكون تايه في الشارع ؟ مع اني في راي بصراحة انه لو سال حد شكله قدامي حيكون افضل من التصرف العيالي ده انه مش عاوز يسال حد وهو عارف كل حاجة
ردحذفاحلام جوليا
ردحذفمنورانى يا جميل و مبسوطه اوى ان عجبك البوست على فكره متهايألى ان ستات مصر كلها مرت بالموقف ده هههههههههه ، يارب بس يكون سبب اننا نفهم اختلافتنا و نحترمها
تقبلى تحياتى
بسم الله
ردحذفاولا حمدا لله ع السلامه
ثانيا كل سنه وانت طيبه
ثالثا فكرة السلسله جميله وانتي النهارده وضحتي حاجه مهمه جدا ان الراجل فعلا لماي كون مركز مش بيسمع اي حاجه تاني
يارب كل الستات يكونو عاقلين زيك كده
هههههههه
تقبلي مروري
مصطفى ابو زيد
ردحذفو انت طيب و بصحه و سلامه ، مانا عامله السلسله بقى عشان الناس تفهم بعض اهو و ان شاء الله هاتلاقى الستات ياخدوا بالهم بعد كده ههههههه
لك منى خالص التحيات
منورة يا بسنت
ردحذفعجبني البوست جميل و فعلا الفكرة صح
معاكي طبعا بانتظار المزيد
همسه
ردحذفانتى اللى منورانى يا جميل ، يارب دايما معايا و متابعانى
لك منى خالص التحيه
كل سنة وانتى طيبة
ردحذفعيد ميلاد سعيد
ربنا يوفقك ويكرمك
مع خالص تحياتى
تامر نبيل
ردحذفو انت طيب و بصحه و بسعاده و نورتنى
لك منى خالص التحيات
كل سنه وانتى بالف خير وصحه وسعاده ياقمرايا ويارب ديما منوره الدنيا حلقه انهارده جميلهبجد ويارب نستفيد من كل حلقاتك ومستنين جديدك
ردحذفطوبه فضه وطوبه دهب
ردحذفو انتى طيبه يا جميله و افضل معاكوا ان شاء الله ،يارب يا قمر يكون بفايده البوست و ننتفع بيه كلنا
لك منى كل تقدير
هههههههههههههه
ردحذفكل سنة و إنت طيبه يا بسنت و عقبال عيد ميلادك ال 23 ^^
على فكرة بوست رائع فعلا ... بس أنا شايف إن هبه كان نفسها تساعد و رامي شايف إنه يقدر يعمل كل حاجه من غير مساعدة منها بس تحليلك للموقف كان رائع :)
هيثم الكاشف
ردحذفو انت طيب و بصحه وسعاده ، بالظبط كده انت لخصت الفكره فى كلمتين و فهمك للموضوع جميل و مبسط
لك منى خالص التحيات
أولا...كل سنة وأنتي طيبة وعقبال مليون سنة
ردحذفثانيا..تصدقي لسه كنت قاري موضوع عن قدرات المرأة والرجل العقلية..لقيت فعلا أن الست تقدر تركز في أكتر من حاجة في وقت واحد بعكس الراجل اللي بيعوض النقص ده بالتركيز في تفاصيل الحاجة الواحدة أكتر من الست
وده يثبت أن الراجل والست ميتسغنوش عن بعض ومتساوون تماما
:)
تحياتي
micheal
ردحذفو انت طيب و بصحه و سعاده ، فعلا كلامك مظبوط الراجل و الست بيكملوا بعض حتى فى ادق تفاصيل حياتهم
نورتنى و لك منى كل تقدير
نصيرة النساء
ردحذفحمداً لله على سلامتك ، افتقدناكي فعلاً
كل عام وانتى بخير حال وعقبال 99 سنة
وموضوع الحلقات الزوجية دة فعلاً جامد ربنا ينفع بيكي .
جزيتي خيراً.
محمد البنا
طريق النجاح
محمد البنا
ردحذفو انت طيب و بصحه و سعاده و تألق دائما ،و يارب الحلقات تعجبكوا و ننتفع بيها كلنا ان شاء الله
دمت فى خير و تقدم
عن تجرررررررررربة الكلام دا مظبوط جداااااااااً
ردحذفشكراً يا بنوتة
سمو الاميره ساره
ردحذفنورتينى يا قمر و سعيده اوى بمشاركتك و يارب متكونش اخر زياره
لك منى خالص التحيات
موضوع حلو اوى وهتبقى سلسله جميله اوى ومفيده لكل زوجين شباب او حتى للى لسه ما اتجوزوش وبتعلمنا بجد المفروض نعمل ايه وما نعملش ايه ، تسلم ايدك واتمنا لك المزيد من الاستمرار والنجاح ........ بالتوفيق ان شاء الله
ردحذف