السبت، 20 فبراير 2010

اول فرحتى



هاحكيلكم النهارده عن بنوته كان عندها 8 سنين
فى يوم من ايام المدرسه كانت حصه العربى
و بالتحديد حصه تعبير
قعدت تكتب و تكتب

و سلمت الكراسه لمدرسه العربى
و عدت ايام
و المدرسه فى اول حصه تعبير نادت عليها
على ورقتها كانت نجمه كبيره قاعده و متربعه
و جمبها اعلى رقم ممكن يحلم بيه تلميذ
رقم 10
و زياده فى الاعجاب من المدرسه
طبعت جمب النجمه كلمه ممتااااااااااز
و قالت للبنوته
لو اديتك هديه تحافظى عليها و تهتمى بيها و كل يوم تراعيها؟؟؟؟
البنوته قالتلها ايوه طبعا
ردت المدرسه
طيب ربنا ادالك هديه حلوه اوى
كلماتك امانه استخدميها فى الخير و حافظى عليها
و اوعى تسيبى القلم من ايديكى بعد كده
و بكره لما تبقى حاجه كبيره اوى افتكرينى
البنوته من يومها و هى بتكتب كل حاجه و اى حاجه
كانت صغنتوته و مكانتش بتعرف تعبر عن احساسها
فكانت بتكتب كل اللى تحس بيه
و حتى بعد ماكبرت و عرفت تعبر و تطلع كل اللى جواها
برضه مسابتش القلم
عشان هى مختارتش الكلمات
الكلمات هى اللى اختارتها
البنوته دى احتفلت يوم الجمعه بأول قصه ليها تشوف النور
فى كتاب شاركها فيه كتير زيها كانت عندهم احلام
البنوته دى
انا
و الكتاب فى المكتبات

الاثنين، 1 فبراير 2010

ناقصه حته

وحشتونى اوى و المدونه وحشتنى
احب اولا اشكر كل الناس اللى سألوا عليا
انا بخير الحمد لله
و الف مبروك لمصرنا الجميله
لفوزها المستحق المشرف و الغير عادى
و يارب دايما متألقه بأولادها
مبسوطه اوى انى مصريه و بعيش على ارضها
.............
موضوع النهارده غريب شويه
مش لأنه محصلش قبل كده
او منتخيلش انه يحصل
لكن لأن الواحد كان فاكر ان المشوار بقى هين
فى طريق زرع احترام المرأه فى نفوس الناس
لكن اول ماقريت عنه
قلت لسه بدررررررررررررررى
عريس فى السعوديه
كاتب كتابه و قضى اجمل ايام الخطوبه مع عروسته
و وقعت فى غرامه و تصورت انه زيها
راسمها فى قلبه و خياله
لحد ماراح يزورها يوم
و لقاها تعبانه شويه و مرهقه
سألها مالك فيكى حاجه ؟؟
قالتله انها تعبت بليل و عملت عمليه الزائده الدوديه
و فجاه راح الحب و الغرام و نسى يقولها كلمه سلامتك
او يطبطب عليها و هى لسه قايمه من عمليه
و قام انتفض و كانها قالتله انها لا قدر الله ..........
و قال لأهلها انا مش هاكمل الجوازه دى
و مضطر اطلقها عشان ............
عشان ناقصه حته
و هو كان عاوز عروسه كامله بجميع اعضائها حتى الزيادات
ايوه زى ماقريتوا
ناقصه حته
مش عارفه ليه تصورت للوهله الاولى انه بيتكلم على عربيه
مش واحده شاركته احلامه و اتكتب اسمها جمب اسمه فى ميثاق غليظ
و اقسم انه يراعى ربنا فيها
كان لسه فى حد بيتعامل مع المرأه على انها بضاعه ضرورى انه يطلع منها كسبان
و يستفاد بكل حته فيها زى ماقال عريسنا ؟؟؟
و كان هو الحقيقه بالجهل الكفايه اللى خلاه يتصور ان الزائده الدوديه
ممكن تكون مرض خطير يورثه الاولاد من امهم
تفتكروا لو كان هو مكانها
كان هايحب ان حد ينظرله نظره نقص و اشمئزاز
و يسيبه و يمشى و هو فى اشد الحاجه الى الحنيه على فراش المرض؟؟؟
انا مش شايفه انها خسرت كتير
بالعكس هى كسبت نفسها بإنذار مبكر
عن شخصيه متستاهلش انه يتقال عليه رجل
لأن كلمه راجل دى كبيره اوى
و معناها اكبر من شويه عنجهيه و تجبر
...........
اشوفكم على خير