استغربت لحال الرجل الشرقى
و اندهشت اكتر لأزدواجيته الواضحه بشكل صارخ
انا كنت مقدره و مناصره
ولا زلت
ان الراجل قبل مايتجوز بنت
يشترط طبعا ولا مجال للمناقشه انها تكون عذراء
محترمه
على خلق
متدينه اى كان دينها
ان تكون اهلا لتصبح ام لأولاده
ان تصون بيته و ماله و شرفه و غيبته
لو مش محجبه ياريت و يا حبذا لو تتحجب
ميكونش ليها اصحاب ولاد يا سلام يا سلام
عز الطلب
حاضر و نعم مايفارقوش لسانها
كل ده انا مكانش عندى مشكله فيه
خااااااااااالص
من حقه ان يظفر بذات الدين
زى ماوصانا الرسول الكريم
بس المفاجأه بقى ان الكلام ده
فى مصر فقط لا غيييييييييييير
ولو سألت اى شاب
لو بيونسيه او اى مثيله لها طبعا
طلبت تتجوزك توافق ؟؟؟؟
من غير كلام الاجابه هتكون
اى نعم
اللى خلانى اقول كده
انى شفت مثال غريب اوى لرجل مصرى
كان زي اى شاب بيحلم بالسفر و انه يشتغل بره
و الدولار مزغلل عينه
سافر و عجبته بنوته شقرا
و قال يجرب التفاح الامريكانى بدل المصرى ابو جنيه
اتجوزها و تخلى عن مبادئه فى انه يكون اول رجل فى حياتها
الراجل عجبته العيشه و فضل يطنش حاجات كتير
مراته بتلبس عريان .......
ايه يعنى خلينى متحضر
اصل فى اوروبا و الدول المتقدمه عشان نتطور
لازم نقلع
مراته جابت بنتين زى القمر
البنات كبروا ميعرفوش حاجه عن مصر ولا اصلهم الشرقى
و البنوته الكبيره وراها الصغيره
بقى ليهم صاحب
البنات سهرانين مع ولاد للصبح
و ايه يعنى خلينى متحضر ماكل البنات فى سنهم كده
البنات كبروا اكتر و اتخلوا عن اعز ما يملكن
و ايه يعنى دى حاجه رمزيه و دى حريه شخصيه
البنات سابوا البيت و عاشوا مع اصحابهم الشباب
من غير جواز
و ايه يعنى الجواز ده شكليات
و فضل يتنازل يتنازل لحد
صاحبنا ما بقى الخواجه جو
بدل ما كان يوسف المصرى
ليه المبادىء و العادات و التقاليد و الشرف
لا يطبق غير جوه مصر بس
و لما نخرج نقلع احنا كمان عبايتنا
عشان ما نعلى و نعلى و نعلى
هو حرام جوه و حلال بره؟؟؟؟؟؟؟
بصي الى عنده مباديء فعلا
ردحذفوعنده بالاهم مرجعيه دينيه حقيقه
هايطبق بره وجوه
انما الى اساسا جواه بايظ
بيقول انا هاتجوز بكر مش عشان تصونه وو و و
لا عشان يبقى اخد احسن بضاعه فى السوق هو مش اقل منها يا معلمي
وعشان هى الفطره كده اصلا
بيقول انا عايزه تقول حاضر ونعم عشان المجتمع يقوله راجل ياض ممشيها تحت طوعك
لما غير المجتمع اتغير
اصله ما كانش بيعمل عشان هو مقتنع ولا عشان ربنا
لا ده عشان المجتمع
الى بيعمل عشان ربنا
ربنا ثابت لا يتغير
انا شوفت ناس عاشوا بره سنين عمرهم واتجوزوا اجانب وخلفوا منهم
ومع ذلك محافظين على اخلاقهم واخلاق ولادهم من الاجانب كمان
حتى لو كانت الام فضلت على ديانتها
صدقنى ده حقيقى مش كلام
وناس اعرفهم شخصيا
وهو ده الفرق بين من هو مرجعيته لله ورسوله
وبين من هو مرجعيته لاي حاجه هبله فى الدنيا
ندى الياسمين
ردحذفالله ينور عليكى بجد جبتى المفيد ،،، فى واحد واخد الموضوع مبدأ ،،، و واحد واخد الموضوع زى مسرحيه عادل امام فى شاهد مشافش حاجه ،، هما اللى قالووووووووله ،،، انا بقى نفسى المجتمع بجد يبقى صادق مع نفسه و اللى مستعد يعمل حاجه بره يعملها جوه قدام الناس ،،و نبطل بقى نرفع شعارات مش مؤمنين بيها
نورتينى بجد و تعليقك شافى ووافى
تقبلى تحياتى
فعلا الموضوع ده حقيقي
ردحذفبس انا شايفه ان الراجل الي يقعد يتشرط قبل الزواج
بكل الشروط الي انت قولتي عليها في الأول ده بيكون راجل حاسس بنقص
يعني كان لافف وداير ومقطع السمكه وديله
ولما يحب يتجوز يدور على نسخه من والدته
ده انسان مش ممكن الواحد يثق فيه أو يحترمه
والواحده متأمنش على نفسها معاه
لأنه مش بيبص على ان الزواج سكن وموده ورحمه
لا بيبص على واحده تربي اللأولاد ويسبها في البيت
زي الكرسي يرجع يلقيها زي ما هيا
أما النوع التاني الي يبيع مبادئه لما يشوف عنين زرقاء وشعر أصفر
ده أصلا مش راجل لأنه باع دينه يعني ممكن يبيع ويضحي بكل حاجه
عموما هما الرجاله كده ومش هيتغيروا
تحياتي ليك
من كل بستان زهره
ردحذفنورتينى و اتشرفت بمرورك ،، عندك حق الراجل الشرقى المجتمع اعطاه نموذج للعروسه الكامله لا يحيد عنه ،،، و الموضوع بقى زى البضاعه للأسف ،،هما الرجاله كده دى بقى عاوزه اقولك ان معظمهم مش كلهم كده بس هو الاكتر من النوع ده ،، مش هايتغيروا ،،، ياريت نقدر نغير من تفكير المجتمع لأنه هو السبب الرئيسى فى تكوين الفكره الخاطئه دى فى عقل الرجال و فى الاول و الاخر المرأه ليها دور كبير لأن هى اللى بتربى من البدايه
دمتى بكل خير و حب
مهو الراجل ده يا يطنش يا هاتاخد عياله و تهرب منه و ممكن كمان تتبلى عليه و تسجنه
ردحذفالراجل اخد قرار و ممكن يكون واثق انه غلط
بس هايعمل ايه
ده وقع فى حفره و مش هايعرف يخرج خلاص
الناس هناك بتخوف اصلها
و لو هو عارف انه لو اخد اولاده و رجع هايلاقى حد يقف معاه ضد الخوجايه اظن انه كان رجع فورا
و عجبى على ولاد بلدنا اللى بيعجبهم التفاح اللى شكله حلو و هو طعمه خيار
عندك حق بس في ناس كتير عندها مباديء واصل بحق وحقيق ولم يسمحوا لانفسهم بالتنازل عنها مهما زغلل التفاح الامريكاني عيونهم
ردحذفاما هؤلاء الذين تتحدثين عنهم وهم كثر فيضعون اقنعة على اجسادهم باكملها ويصبح لديهم من السهل خلع هذا القناع مع تغير الجو والمكان
سبق واتكلمت على نقطة الازدواجية في الموضوع ده تحديدا في بوستات كلنا ليلى
ردحذفبمناسبة موضع العذرية..شوفي اخر بوست عندي يا بسنت حتلاقيه تقريبا مكمل لللي أنتي قولتيه
تحياتي
نتيجة لان الدين والاخلاق والمبادىء عندنا بقت قشرة خارجية بس
ردحذفاول ما بنخرج بره مصر بنقلعها مع مرور الوقت
بس مش كل الناس كده
بسنت نصيره النساء
ردحذفمواضيعك شيقه وعميقه
فعلاً هناك من يتخلون عن كثيراً من مبادئهم لأشياء رخيصه ولكنها في نظرهم غاليه .
الخسران على أمثال هؤلاء
تقبلي مروري
محمد البنا
طريق النجاح
ببساطة لان الرجل من هذا النوع بيهتم بنظرة الناس له سواء جوا مصر اوبرا مصر وحسب نوعية الناس الي عايش بينهم بيعيش لا مبادئ ولا اخلاق وعجبي على الزمان ده يا بسنت مواضيعك شيقة ومثيرة وبتمسنا بجد والاجمل فيها اسلوب عرضك الحيادي للمسألة دمتي بود
ردحذفالازدواجيه دى عنده فى البنيه والتربيه من البدايه لكن لو عنده دين واخلاق من البدايه عمره ما كان هيبقى عنده ازدواجيه ابدا ما فى ناس كتير برا ومحافظه على دينها واخلاقها لكن دا الموضوع معاه مش فارق يبقى اكيد هو كمان ما ينفعش يبقى فارق او انه يحسب فى تعداد الرجال تسلم ايدك موضوع جميل
ردحذفهو للأسف لما تكون الاخلاق مظاهر و تماشي مع الشيئ السائد بالمجمتع و مش قناعات و مبادئ
ردحذفاكيد بتكون قابلة للتغيير ، بحالة تغير المجتمع
اكيد في ناس بتكون حاملة قناعات و مهما تغيرت الاماكن ما داخلهم يبقى ثابت
والخسران هو اللي خسر نفسه و اخلاقة و دينه بس عشان يكون مقبول بالمجتمع اللي هو فيه
تحياتي يا بسنت :)
سلام الله عليكم ورحمته وبركاته
ردحذفانا لي راي تاني بصراحه
مش كل الناس كده
ده يمكن مثال من اقليه
ولكن بفضل الله معظمنا الي متمسك بدينه هنا
هيتمسك بدينه بره
وده كله بيرجع لقوة الايمان
بس ربنا يهدي الجميع
اولا: يسلم لسانك يعني صح لسانك
ردحذفوانتي عارفة اني من اشد المعجبين بقلمك وان طالت الغيبة لظروف خارج الارادة لكن دائما احرص بالمرور لاقف تحت هذا المطر لاتمتع بنشوة الحياة واتعطر بنفحات كلامك..
:ثانيا: انضم لكل حرف وباعتزاز لهذة الصبية التي جعلتني ان استشعر منها الاصالة التي ننشد دوما
لدرجة ممكن ان اقول معها اني الام والاخت والحبيبة والمراة الجميلة التي نطمح واختم الله يحماكي على هذا الحس والاحساس وهذا الصوت وهذا الصدى الذي اسني ومسني لدرجة على استعداد ان انحني لكي وان اتمنى لكي شيئا اتمنى ان يحفظك الله في ذمة رجل تجدي فية صفات كل الرجال البواسل لانكي مثلك يستحق هذا واكثر
اسمعي باختصار انتي رائعة جدا والله اسعدتيني بجد
ثالثا: انا مو مصري ولكن افتخر بهذة الام واعشق ثرها وناسها وحضارتها وحتى زبالتها شو رايك؟؟
لكن كل ما اعرفة ان المصري لو عاش اينما كان سيقيم مصر العظيمة التي نحب فيها الام والصبية ونتمناها لنا لانها جامعة مانعة..
وان هذا الشخص للاسف بالاسم مصري حتى لما كان بمصر ونحن نعلم عراقة العائلات الاصلية وحتى تقاليد الاماكن الشعبية ابدا المستحيل ان المصري يكون غير مصري والله احنا بنموت في مصر واهلها للحجات الحلوة دى واذا كان واحد فاقد هويتة وباع نفسة هذا لايعني ابدا ان البنت المصرية تخع لماضلة مع غيرها لايوجد اصلا مفاضلة او مقارنة مع الغربية لان الغربية لو ملكت كل جمال الدنيا تتسول حفنة من روح المصرية روح الدنيا وخفة دمها موجود في المصرية واما بالنسبة للجمال موجود في كل مكان والجمال جمال العقل والروح والقلب كل لقيتة في كلام البنت المصرية اقصد انتي ياسيدتي
والله انتم الوفاء والحب والجمال وروح الدنيا
ومصر ستبقى عظيمة بامثالك انتي لانك مصرية حتى النخاع
التحية كلها لكي
وخالص المودة والتقدير
مني انا حلم
سعدت جدا هنا
الجواز و سنينه
ردحذففعلا كل كلامك صح بس اللى بيضايقنى ان اللى بياخد الخطوه دى مش بيفكر فى ابعاد الموضوع و نتائج قراراته و كأن الزواج اللى المفروض انه الرباط المقدس و الميثاق الغليظ اللى ذكره رب العباد مجرد لعبه و تجربه يا تنجح يا تفشل ،، و نسى ان من واجبه ان يختار لأولاده امهم قبل ان يختار لنفسه زوجه
اشكرك لمرورك و توضيحك لفكره كانت غايبه عنى
رشا عبيد
ردحذفبالظبط انا معاكى ان دى اقنعه تتغير بتغير المكان و للأسف الشباب اللى بالشكل ده انتشروا اوى و بقى عدم الانتماء و التخلى عن التقاليد من سمه العصر
تقبلى تحياتى و مودتى
michael
ردحذفاشكرك على مرورك و على تنويهك للبوستات و انا بدعو كل القراء هنا انهم يقروا البوستات اللى بتكمل موضوعى خصوصا و ان كلنا المفروض نستخدم مانملك بقدر الامكان و نتكاتف اننا نغير ثقافه المجتمع و نسلط الضوء على عيوبنا و انا مبسوطه اوى ان ده مش اول موضوع نطلع كاتبين عنه احنا الاتنين بالصدفه بس المره الجايه بقى عاوزين بجد كل االمدونين ياريت يتبنوا فكره تخدم المجتمع و بلادنا
تقبل خالص تقديرى
حلم بيعافر
ردحذفعجبنى اوى تعبير التدين و المبادىء بقت قشره خارجيه ،، للأسف دى اكبر مصيبه وقع فيها المجتمع الشرقى لأننا لو التزمنا بتعاليم الدين و المبادىء فعلا فى الباطن اكتر من الظاهر كان زماننا بقى لينا شأن تانى زى زمان و فعلا مش كله كده و انا بتمنى يبقوا حاله نادره
لك منى خالص التحيات
محمد البنا
ردحذفمش عارفه ليه فى زماننا الناس بقوا سطحيين اوى و تخلوا عن الجمال الداخلى بزهوه البريق حتى و ان كان كداب و ممكن يفنوا عمرهم و كرامتهم فى سبيل ذلك
تمنياتى بمزيد من التقدم و النجاح لطريق النجاح
احلام جوليا
ردحذفيارب دايما افيد و استفيد يا قمر ،، تعليقك بصراحه جاب من الاخر الناس بقت بتغير جلدها من بلد لبلد يعنى لو راح السعوديه هايلبس مراته نقاب و لو راح امريكا هايقلعها حجابها ،، و زى ماالدنيا بترميه بيتلون بلون الارض اللى عايش فيها
نورتينى و تقبلى خالص تحياتى
طوبه فضه و طوبه ذهب
ردحذفعندك حق يا قمر التربيه هى الاساس فى غرس الانتماء و المبادىء التى لا تتجزأ ، بس دلوقتى الشباب دول مش بيهدموا حياتهم بس دول بيهدموا بلد بأكملها لأن الازدواجيه لم تقتصر على الجواز بس دى بتمس كل حاجه فى حياتنا ،، الموضوع محتاج اهتمام و توعيه اكتر
شرفتينى بالمرور تقبلى خالص حبى و تقديرى
همسه
ردحذفياريت يبقى الخسران خسران لنفسه بس مكانتش دى المشكله ،، بس دى بقت زى العدوى و الشباب بينشروا ثقافه عدم الانتماء دى بينهم و بين بعض فى غفله من المجتمع
لك منى خالص التحيات و التقدير
ابو بدر الدين
ردحذفو عليكم السلام و رحمه الله وب ركاته
تشرفت بمرورك و برأيك و انا اتمنى من كل قلبى انها تبقى اقليه ،، بس كمان اتمنى اننا مندفنش رؤؤسنا فى الرمال لحد ما الظاهره تتفشى ،، و انا من رأيى انها حتى لو كانت اقليه لازمن نوجه شبابنا ان كون اللى بيعمل كده قله لا ينفى وجود خطأ ما
تقبل منى خالص التحيات
حلم
ردحذفانا بشكرك جدا على كل الكلام الجميل و المشاعر الطيبه و الرقيقه دى و اتمنى ان استحقه فعلا و ان اكون عند حسن ظنكم بى ، و الف شكر و تقدير على الدعوه الجميله و مديحك فى بلادى الغاليه على قلوبنا كلنا ،، و لبلادنا و اخوتنا العربيه اللى بنتمنى ان يحفظها لينا الله من كل حاقد ، و انا بضم صوتى لصوتك و بقول ان اى بنت عربيه مش مصريه بس لا تقبل مقارنه مع اى اوروبيه فيكفى انها تحمل اصاله و عزه نفس و كرم و اخلاق العرب و هى الوحيده الامينه على تربيه اطفال يحملون اسم بلادهم
نورت المدونه و تقبل منى خالص التقدير و الموده و الاحترام
الاخت العزيزة بسنت
ردحذفكيف حالك عزيزتى ايه اخبارك اتمنى تكونى بالف خير وصحة وسعادة
ربنا يوفقك فى كل خطوة فى مشوار حياتك
تحياتى ليكى
مامه مازن
ردحذفايه الغيبه الطويله دى يا قمر وحشتينى خالص والله ،، يارب يكون اللى شاغلك خير و سلامى للأمير و الاميره الصغنتوته