ربنا مايجبش قهر

لو سألت حد تعرف القهر النفسى؟عمرك حسيت بيه؟ هايقولى قهر ايه ربنا مايجبش قهر ماحنا عايشين كويس و محدش يقدر يقهرنا

انما الحقيقه ان كلنا اتعرضنا للقهر النفسى رجاله وستات و دول كمان

القهر النفسى اشد كتير اوى من القهر الجسدى و العنف بأنواعه

اصلك لو اتعذبت او اتألمت ممكن تستمد منه القوه عشان تدافع و تحارب عن نفسك

انما لو روحك اصيبت فى مقتل و كبلتها القيود و الاغلال يبقى ازى الحال؟

قوتك الداخليه هاتختفى شيئا فشيئا

مش هاتقدرى تعيشى وهاتفقدى ابسط لذه فى الحياه و هى الشعور بيها

الكبت و قمع الرغبات و الاستهانه بقدراتك نوع من انواع القهر

ان يتم استغلال عواطفك و مشاعرك لتقيدك و ترغمك على الخضوع

وان يظل جلادك يسمم افكارك و يقنعك انك لا تستطيعى النجاح و انك لا تصلحى

و انك لست اهلا لها و ان حياتك بلا فائده

نوع من انواع القهر

ان يستهزىء بك الطرف الأخر و بكل ما له قيمه فى حياتك

ان يحرمك من تحقيق احلامك و طموحاتك و يعتبرها درب من الجنون و السفه

نوع من انواع القهر

مسلسل القهر ليس له الا طريق واحد

الأكتئاب و تبلد المشاعر

الا اذا........

تمردى....

ايوه تمردى

لكن مش التمرد بمعناه السلبى

اقصد التمرد على الواقع

التمرد على الضغط النفسى والعصبى

اكسرى القيود

ثورى و جربى ان تقولى ولو لمره لا

لا... محدش هايستهين بيا بعد اليوم

لا... انا استحق ان احيا و ان انجح

لا...محدش هايستغل عواطفى و مشاعرى كوسيله للضغط

لا...لن اكون مثل الدميه فى مسرح الحياه تحركنى الخيوط

سأقطع كل الخيوط و التقط زمام حياتى

لا...زى ما عليا واجبات انا ليا حقوق و بطالب بيها و ابسطها حقى فى حياه سعيده

اكسرى القيود و حطمى الحواجز ..لا تستسلمى

اقتلى خوفك وتحررى

ابحثى بداخلك عما يسعدك ،عما تتقنيه

ازيحى الغبار عن احلامك و طموحاتك وحققيها

ارضيتى كثير من الناس و قد جاء الوقت بأن تطلبى لنفسك و ان ترضيها كما نسيتيها

دندنى ابيات ام كلثوم

اعطنى حريتى اطلق يداى

انى اعطيت ما استبقيت شيئ

اه من قيدك ادمى معصمى

لم ابقيه وما ابقى علي

و اخيرا ارفعى رأسك عاليا و تحررى.....

انا لله وانا اليه راجعون

اللهم : ياحنان يامنان ياواسع الغفران اغفر له وارحمة وعافه واعف عنه واكرم نزله ووسع مدخله وأغسله بالماء والثلج والبرد ونقه من الذنوب والخطايا كما ينقى الثوب الأبيض من الدنس
اللهم : أبدله دارا خيرا من داره وأهلا خيرا من أهله وأدخله الجنة وأعذه من عذاب القبر ومن عذاب النار
اللهم : عامله بما انت اهله ولا تعامله بما هو أهله
اللهم : ان كان محسنا فزد فى حسناته وان كان مسيئا فتجاوز عن سيئاته
اللهم : أدخله الجنة من غير مناقشة حساب ولا سابقة عذاب
اللهم : انزله منزلا مباركا وانت خير المنزلين
اللهم : انزله منازل الصديقين والشهداء والصالحين وحسن أولئك رفيقا
اللهم : أجعل قبره روضة من رياض الجنة ولا تجعله حفرة من حفر النار
اللهم : أفسح له قبره ومد بصره وأفرش قبرة من فراش الجنة
اللهم : أعذه من عذاب القبر وجاف الأرض عن جنبيه
اللهم : أملأ قبره بالرضا والنور والفسحة والسرور
اللهم : قه السيئات ومن تق السيئات يومئذ فقد رحمته
اللهم : أغفر له فى المهديين واخلفه فى عقبة فى الغابرين واغفرلنا وله يا رب العالمين وأفسح له فى قبره ونور له فيه
اللهم : إن محمد فى ذمتك وحبل جوارك فقه من فتنة القبر وعذاب النار وانت أهل الوفاء والحق فأغفر له وارحمه إنك أنت الغفور الرحيم
للهم : اجعل عن يمينه نورا وعن شماله نورا ومن امامه نورا ومن فوقه نورا حتى تبعثه آمنا مطمئنا فى نور من نورك
اللهم اجعله فرطا" لأبويه وسلفا" وذخرا" وعظة واعتبارا" وشفيعا". وثقل به موازينهما وأفرغ الصبر على قلوبهما ولا تفتنهما بعده ولا تحرمهما أجره
امين... امين... امين

ابو العريف

مين فيكوا قابل ابو العريف؟،طبعا كلنا،ابوالعريف تلاقيه فى اى قعده ممكن يكون واحد صاحبك

دايما عامل نفسه فاهم فى كل حاجه و بيفتى فى كل حاجه، واول ماتفتح موضوع تلاقيه زى الكتكوت الفصيح

يقوم ويصيح ويبدع فى التأليف و يجيب كلمه من هنا و كلمه من هنا،و غالبا بيكون كلامه كله فى الباتنجان ،و مع ذلك تلاقيه بيكلمك بأقتناع رهيب ،و صعب تخليه يغير رأيه،

و رجاله كتير بيتبرعوا بأنهم يقوموا بدور ابو العريف خصوصا فيما يتعلق بالنساء

و اشهر جملتين بيفتوا فيهم كالتالى:

لما بتيجى سيره ابونا ادم وامنا حواء عليهما السلام

تلاقيه يتكلم بأسى ياعينى على ابونا ادم اللى مراته حرمته من الجنه

و حرمت معاها البشريه كلها

مستغل المقوله اللى بتقول عندما تحدث جريمه فتش عن المرأه

و اللى نفسى اعرفه هما بيجيبوا الكلام ده منين

و لاهو هجوم و انتقاد لمجرد التقليل من شأن المرأه

و وصمها بجريمه تخريب الكون، و ان الراجل هو اللى مهمته يعدل المايله

مع ان الله عز وجل قدر من قبل ان يسكن ادم وزوجه الجنه انهما خارجين منها لا محاله ليعمروا الأرض بدليل قوله تعالى فى كتابه العزيز

"سوره البَقَرَة آية رقم : 30قرآن كريم "وَإِذْ قَالَ رَبُّكَ لِلمَلائِكَةِ إِنِّي جَاعِلٌ فِي الأَرْضِ خَلِيفَةً قَالُوا أَتَجْعَلُ فِيهَا مَن يُّفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لا تَعْلَمُونَ"

و كمان الغريب ان لم يذكر فى القرأن من السبب فى الخروج ولكنها المعصيه لا غير

و كيف يذكر اول امرأه فى الكون بهذا السوء و يلحق بها تهمه هى بريئه منها و هو القرأن الكريم المنزه عن العنصريه و التلفيق

حيث قال عزوجل" فَوَسْوَسَ إِلَيْهِ الشَّيْطَانُ قَالَ يَا آَدَمُ هَلْ أَدُلُّكَ عَلَى شَجَرَةِ الْخُلْدِ وَمُلْكٍ لا يَبْلَى (120)فَأَكَلا مِنْهَا فَبَدَتْ لَهُمَا سَوْآَتُهُمَا وَطَفِقَا يَخْصِفَانِ عَلَيْهِمَا مِنْ وَرَقِ الْجَنَّةِوَعَصَى آَدَمُ رَبَّهُ فَغَوَى (121) ثُمَّ اجْتَبَاهُ رَبُّهُ فَتَابَ عَلَيْهِ وَهَدَى (122)"

سبحان الله واضح يعنى امنا حواء لم يكن لها اى دور فى مسأله الخروج ده غير انها اتبعت اوامر زوجها، و ان عصت فأنها لم تعصى منفرده ولم تحرض على المعصيه

يعنى اللى بيقول كده مش بس بيظلم المرأه عامه ،لا ده كمان بيفترى كذبا على السيده ام جميع البشر

و الادهى انه بيخالف القرأن

اما الحاجه التانيه اللى صاحبنا ابو العريف بيبدع فى شرحها

لما تلاقيه يقولك اه الستات دى متنفعش فى حاجه حتى الرسول قال كده

ايوه امال انتوا متعرفوش ولا ايه؟

ازاى متعرفوش استنوا بقى انتوا جيتوا للشخص المناسب مش الرسول عليه افضل الصلاه والسلام يا جماعه قال فى حديث شريف

(( النساء ناقصات عقل ودين ))

اهو انا جبت حاجه من عندى اهم ناقصات عقل ودين يعنى مش بيفكروا و مش متدينين

و الحقيقه ان ابو العريف هو اللى ناقص عقل بمعناها الصريح بدليل عدم فهمه و دين بدليل عدم محاولته حتى انه يفهم دينه صح

الحديث الشريف بعيد تمام البعد عن الاهانه التى لم نعتادها من رسولنا الكريم

الحديث طبعا فى جزء منه يدل على ذكاء المرأه مما يخالف تفسيرنا الخاطىء له

غندما قال الرسول الكريم" وما رأيت من ناقصاتِ عقلٍ ودين أغلبَ لذي لبٍّ مِنْكُن"

بمعنى ان تعجب الرسول صلى الله عليه وسلم من قدرات النساء، وأن الواحدة منهن تغلب ذا اللب أي الرجل الذكي جدًّا. فكيف تغلب ناقصة العقل رجلاً ذكيًّا جدًّا؟

الحديث يشير لحقائق علميه ودينيه بحته

و يقصد بنقصان العقل ان الله عز وجل جعل شهاده المرأه ملزمه وجود امرأتان لكى تذكر احداهما الأخرى

ليس لعيب فى صدقهما لا سمح الله

و لكن لأن المرأه تمر في حالات وتتعرض لتغيرات جسدية ونفسية تؤثر على طريقة تفكيرها. وهذا التأثير ينعكس على القرار الذي يمكن أن تتخذه المرأة. زد على ذلك ما تملكه المرأة من عواطف جياشة تفوق ما يملكه الرجل، وهذا عنصر لا يمكن إغفاله في العقل، ويمكن أن يؤثر بشكل واضح في القرار، طبعا لأن المرأه تفكر اكثر بقلبها و عاطفيه بخلاف الرجل

اما ناقصه دين و ذلك لأن الله فطرها بطبيعه خاصه تختلف عن الرجال و تحتم عليها انها تمتنع عن الصلاة والصيام

فى اوقات معينه

اخيرا لا املك غير انى احمد الله العظيم العادل الذى كرم المرأه و لم يترك مجال لكل سفيه انه يهينها و يقلل من قدرها

و افتخر بأنى ناقصه عقل ودين كما وصفنا رسول الله

ياناس ياعسل التاج وصل

احب اشكر اولا نونا حبيبتى صاحبه مدونه بلاش فضايح و مامه مازن الرقيقه صاحبه مدونه حياه بكل مافيها

على تمرير التاج الجميل ده

اسمك ؟

بسنت صلاح الدين

المشهور بيه وسط اصحابك؟

بوسى و ساعات كتير اوى توتا نظرا لأن انا كل الناس عندى بقولها توتا ولاد بنات كله توتا

سنك ؟

22

اسم مدونتك ؟

يا نساء العالم اتحدن و طبعا كنت حاسه ان الرجاله هاتعلن على المدونه الحرب بس الحمد لله

عدت على خير و بصراحه متابعنى عدد معقول من الرجال المحترمين اصحاب العقول المتفتحه

مجال دراستك ؟

ليسانس من كليه الاثار جامعه القاهره

فكرت فى الماجستير بس ملقيتش فرصه و لكنه حلم هيفضل فى بالى و ان شاء الله هعمله فى يوم

الصورة الرمزية لمدونتك بتعبر عن ايه ؟

عندى صوره صغيره لفتاه تحمل صولجان وتلبس تاج

و هى المرأه الأمبراطوره او الحاكمه لكن بطمنكوا معنديش اى نيه فى للأستيلاء على العرش

هل فكرت فى إغلاق المدونة ؟ والسبب ؟

لا خالص ،عشان شايفه انى بعرض رأى كويس و محترم

ايه رد فعلك لو حد قل أدبه عليك في التعليق ؟

يارب متحصلش بس وارد يعنى انا شاكه ان جمعيه يارجال العالم اتحدوا متأمرين ضدى

اكيد هارد بأدب و احاول افهم وجهه نظره

أسوأ مدونة ؟

الحمد لله لسه ماشوفتش بس انا فى رأيى ان اى مدونه يحترم رأى صاحبها طالما كان بعيد عن التجريح و الاساءه

هيحصل ايه للإيميل بتاعك بعد ما تموت ؟

مش عارفه البركه فى الورثه بقى

أديت الباس وورد لحد قبل كده ... ؟

اه لخطيبى يعنى ماهو اخد باسوورد قلبى مش كتير عليه باسوورد المدونه

السفر بالنسبة لك ؟

اكبر متعه فى حياتى بحب اروح اماكن جديده انا بطبعى مش روتينيه فبحب التغيير

المود بتاعك ؟

حساسه الى ابعد الحدود و رومانسيه لدرجه العبط فى كثير من الاحيان

لو حد مش واخده عليه تلاقينى هاديه اوى لكن لو حد اعرفه باخد راحتى بقى و مش ببطل كلام وهزار

بتعمل ايه فى وقت فراغك ؟

احب اقرأ و اكتب و النت كمان بقى مهم اوى عندى

و بحب اسمع موسيقى و اتفرج على الافلام الاجنبى

الأكلة المفضلة ؟

بحب البشاميل و محشى الكوسه و البيتزا و اى حاجه بانيه

بحب البهارات اوى على الاكل و السلطه بموت فيها

عموما بحب اى حاجه مادام بعيده عن البصل

الصفات التى ورثتها من والدك ؟

بابا حبيبى ربنا يخليهولى يارب اكون ورثت منه حنيته و طيبته ومثاليته و انه بيقدر ظروف الناس اوى

و قناعته وتواضعه و تضحيته

الصفات التى ورثتها عن والدتك ؟

ماما صاحبتى مقدرش اعيش من غيرها،يارب اكون ورثت منها تحملها المسئوليه و خفه دمها و روحها المرحه

و انها بتعرف تتصرف فى اى حاجه وفى كل حاجه،رومانسيتها الرائعه و حنيتها و طيبتها اللى ملهاش حدود

مساعدتها للناس فى اى موقف و بتقف وقفه جدعه اوى مع اى حد فى الافراح والاحزان

أكتر ست حاجات بتكرهها ؟
الظلم

الحرب

الكذب

القسوه

الفراق

العنصريه

أكتر ست حاجات بتحبها ؟

خطيبى

الحب

العدل

التضحيه

الحنان

السلام

شخصيتك نوعها ايه ؟

رومانسيه اوى و حساسه جدا،متفاهمه الى ابعد الحدود،مش بحب المشاكل

طموحه اوى و عندى احلام كتير، برضى الاخرين على حساب نفسى كتير اوى لدرجه انى بنسى انا نفسى فى ايه

لماذا دخلت عالم التدوين ؟

عشان بحب اكتب اوى من صغرى شعر وقصص، يعنى طول عمرى الكتابه عندى ليها الاولويه فى يومى

حتى لو كانت عباره عن مذكرات شخصيه

أجمل كلمة قيلت فى وصف مدونتك ؟

كل التعليقات بصراحه اسعدتنى و خصوصا انها بتناقش قضايا مهمه

أهمية التعليق بالنسبه لك ؟

اهم حاجه فى المدونه لأنه بيقيم كتابتى من ناحيه و كمان بيفتح باب للمناقشه وتقريب وجهات النظر من ناحيه تانيه

أحسن بوست كتبته وليه ؟ ضع اللينك

لا بحبهم كلهم لأنهم عبروا عن مشاكل حقيقيه موجوده فى المجتمع

أفضل بوست قرأته ؟وأفضل مدونة؟

بصراحه انا يشرفنى اوى ان كل البوستات و المدونات اللى قريتها هايله و اثبتت ان الناس بالكتابه ممكن تنتج كتير اوى

المدونات اللى عندى فى القائمه هم افضل مدونات فى نظرى

حبشتكنات فلسفيه

حياه بكل مافيها

بلاش فضايح

شمس النهار

انترنتاوى

فتافيت ربع قرن

كلام امرأه

رغى امراه غير مطحونه

فى دقيقتين

ندا.ندا

الوطن ده وطنى

روح قلب ماما

زوبعه

البت المشمشيه حلوه بس شقيه

الضاحكون

يارب اكون منسيتش حد....

الإنترنت بالنسبة لك ايه ؟

مهم اوى معتقدش انى اقدر استغنى عنه

تمرر التاج لمين ؟

امرره لكل المدونات اللى ذكرتها والناس اللى متابعانى يالا بجد عاوزه اتعرف عليكوا اكتر

يارب اكون كنت ضيفه خفيفه عليكوا .......

جيران الهنا

فى بيتنا القديم جارتين بيمثلوا صنفين من النساء متناقضين تماما

احب اعرفكم عليهم ، طنط ضعيفه ، و طنط مستقويه، سعدنى الحظ انى اجاورهم

احكيلكم الاول عن طنط ضعيفه

طنط ضعيفه دائما و ابدا على وشها ابتسامه بلهاء ، و بصراحه عمرى مشفتلها سبب ،

مع ان جوزها مطلع عينها ، من ضرب و اهانات و الذى منه ، و ردها المستفز علطول

بيكون ضحكه مستعبطه و تقول :يعنى اعمل ايه

الراجل بصراحه بيعمل اللى يقدر عليه و زياده شويه

و دى مفيش فايده ولا بتنطق

جاتلنا يوم تخبط على الباب فتحت و لقيتلكوا طنط وشها كأنه الطريق الدائرى

ساعه مبتحصل فيه حادثه من ام خمس عربيات دى

و ماشاء الله كله الوان ازرق و احمر و فوشيا و مطبات

طبعا استنتجت ان الفطار كان علقه سخنه

انا : مالك يا طنط ، الحقى يا ماما

طنط و برضه الابتسامه اياها على وشها: ابدا يا حبيبتى ده عمك بس كنت بطلب منه طلب

و طبعا دخلتها و قعدت تحكى لماما و انا مذبهله (من ذهول يعنى)

جوزها بصراحه ابن حلال يعنى مفيش مصروف للبيت ، و لو طلبت يبقى يومها مش معدى

ويا ويلها لو ابدت رأيها فى موضوع قدام ضيوف ،هاتتهزق قدام الناس عشان جوزها مقتنع

ان الستات مالهاش رأى و ان رأيها لازم يكون من رأى جوزها والخ والخ.........

كل ده و طنط برضه بتضحك و انهت كلامها بجملتها المعهوده:يعنى اعمل ايه؟؟؟؟

طبعا كان نفسى اقولها تعمل ايه بس استسلمت لغمزات ماما عشان ماخربش بيت الست

(قال يعنى هو كده عمران) المهم مسكت نفسى بالعافيه

و رجعت طنط لمعتقل جوانتنامو (قصدى بيتها) و هى بتضحك (ربنا مايقطع لها عاده)

اما بقى طنط مستقويه

فطنط بقى صبح وليل و ليل و صبح

بتتخانق مع جوزها يقول كلمه ترد بعشره و رغم انه بيضربها بس هى الشهاده لله مبتسيبش حقها

فى يوم مغيم كده سمعنا صوت ولاد بتعيط و بيخبطوا على الباب

بنفتح لقيناهم ولاد طنط مستقويه و كل الجيران متجمعين

ماما :مالكم يا ولاد فى ايه؟

الولاد:الحقوا ماما هاترمى بابا بأنبوبه البوتجاز

انا سمعت انبوبه من هنا و صرخت بصوت جهورى:هى فيها أنابيب... انبطحووووووووووووووووووووووووووووووا

طبعا بعد اليوم المشهود ده عمو جوز طنط مستقويه دخل الغاز و استغنى عن الانابيب

و كفى الله المؤمنين شر القتال

الحقيقه الاتنين غلط فى تصرفاتهم يعنى الست مش المفروض انها تكون ضعيفه لدرجه الهطل

و تبقى مسلوبه الأراده والرأى كده ،طبعا الطاعه مطلوبه بس مفيش مانع من مناقشه خفيفه لا ضرر منها ولا ضرار

عشان الزوج يحس ان مراته ليها رأى و شخصيه مستقله و عليه احترامها و ان الموجود فى راسها ده عقل مش طبيخ

والا سيستمر فى اهانتها املا فى يوم انها تنطق او تعترض و تحسسه بوجودها و كيانها

لأن الرجل و ان كان بيحب المرأه الرقيقه لكن لا يحب المرأه الضعيفه على طول الخط

يحبها ذكيه تحاوره و تفهمه و تناقشه و ان اختلفوا فلا تفسد للحب قضيه

ولا المفروض ان المرأه تبقى مستقويه

صوتها عالى و على اهبه الاستعداد للمواجهه وواقفه على الواحده

والا سيصبح البيت ساحه للقتال و البقاء فيه محكوم بقانون الغابه للأقوى و الأعنف

فى خيط رفيع اوى بين المرأه قويه الشخصيه و بين المرأه سليطه اللسان

و خيط ارفع بين امرأه مطيعه واخرى ضعيفه الشخصيه

المرأه الذكيه بقى هى اللى تقدر تجمع بين الصفتين و تضيف توابل و تقلل ملح

و تطلعلنا فى الاخر طبخه مظبوطه

بالهنا .......