كل سنه وانتوا طيبين
و قبل رمضان والانشغال فى العبادات و العزومات
عاوزه اقولكوا كام حاجه كده
اولا و نظرا لقدوم الشهر الكريم
فأنا قررت انى ارحمكم من البوستات اياها
و هانتكلم عن شهرنا الكريم و الاستعداد ليه
و قد ايه هو فرصه حلوه عشان نصلح بيها
حاجات كتير غلط فى حياتنا
و كمان بعد رمضان و العيد الكريم
ان شاء الله هاتلاقوا مواضيع جديده و بوستات
تهم و تناسب كل الزوار الكرام من الجنسين
يعنى هانعمل نيولوك جديد للمدونه
و خلونا نبدأ بإسم الله
السنه دى بقى غير كل سنه يالا نعمل أجنده لرمضان
خطوه خطوه هانصلح من نفسنا
هانجيب سله مهملات ونخلص من كل مشاكلنا
اولا........
العصبيه اللى بتعم على الاجواء الصياميه طوووووول النهار
و خصوصا للرجاله و اللى بيشتغلوا الصبح كتير
فطبعا بيبقوا مش طايقين نفسهم
احب اقولهم اننا هانتخلص بقى من عصبيتنا
بطريقه جديده
الخبراء بيقولوا ان نقص السكر فى الجسم
هو السبب فى اضطرابات الاعصاب و ضيق الخلق
عشان كده و سنه عن نبينا هاناكل كميه مناسبه من التمر
على الافطار عشان يريح معدتنا و على السحور عشان يريح اعصابنا فى النهار
ثانيا..........
هانبعد عن الزيوت الكتير فى الاطعمه المقليه
و التوابل و المياه الغازيه و القهوه
و نبدلها بالخضروات و المياه و العصائر عشان نتخلص من عسر الهضم و زياده الكوليسترول
و اهم حاجه يا جماعه المياه لأنها مهمه فى حاجتين
بتزود الطاقه وبتظبط ضغط الدم و بتقضى على الضعف العام
و مهمتها التانيه انها مفيده جدا للجلد لأنها بتساعده على التخلص من كل مشاكله
ثالثا.........
الناس اللى عاوزه تخس
فرصتها كبيره فى رمضان على عكس ما يتخيله البعض
هناكل كل حاجه بس بكميات قليله
هانقلل فى الزيت و السمنه و احنا بنطبخ
هناكل خضروات كتيييير اوى
و نستبدل القطايف و الحلويات الشرقيه على قدر الامكان بالفواكه و العصائر الطبيعيه
رابعا..........
ودى مهمه اوى يا جماعه بالله عليكوا
نبطل بقى التدخين
السنه دى ان شاء الله
هانصوم اربعه عشر ساعه
يعنى اكتر من نص يوم
معقول مش هانبقى عندنا اراده نستحمل العشر ساعات اللى باقيين
و منهم كذا ساعه ضايعين فى النوم
بلاش بس تقول مش هاقدر
انوى بس و استعين بالله و قول ان شاء الله هاحاول
و ربنا هايعينك ان شاء الله
بس انت اشرب مياه كتير و عصير ليمون
و لازم دش بارد الصبح و قبل النوم
و كل ماتجيلك رغبه فى انك تشرب سيجاره اعمل اى حاجه تشغل نفسك بيها
قوم صلى ركعتين
قوم كل اى حاجه بتحبها
اخرج و خد نفس عميق و اعمل رياضه مشى او جرى
و على فكره رمضان فرصه عشان انت اصلا هاتبقى مشغول بالعزومات
و الزيارات و الاهل و الاصحاب و الصلاه و قراءه القرأن
كفايه عليكوا كده النهارده
البوست اللى جاى هانشوف ازاى نخلى جو البيت كله رمضان
و شويه افكار لتنظيم العزومات
على كام طريقه نوفر بيهم الوقت اللى بيضيع فى المطبخ
على فكره حلوه بقى لأحبابنا الاطفال نشجعهم بيها على الصيام
اترككم فى رعايه الله
كل سنه وانتوا بألف خير
ريمان ونوسه فى هاكونا مطاطا
ردحذفنورتونى يا قمرات اكيد علطول وراكوا على هاكونا مطاطا ،حد يلاقى فرفشه و يروح فى اى حته تانيه،و ان شاء الله اكيد اللينك هاينورنى
كل سنة و أنت طيبه يا بسنت و ربنا يغفرلنا كل ذنوبنا في هذا الشهر الكريم ^^
ردحذفايه النصايح الحلوه دي كلها :)
أنا بحب رمضان علشان يديني جو وهم بعيش فيه لذيذ جدا ^^
هيثم الكاشف
ردحذفوانت طيب و بألف خير ،و يارب امين ان شاء الله نكون من عتقاء الرحمن ،رمضان سبحان الله لا يختلف عليه اثنان ربنا وضع محبته فى قلوب عباده،جو جميل من التسامح و الصبر و السكينه اللى بتنزل على قلوب العباد و لمه العائله و الاصحاب ،اللهم بلغنا رمضان
كل سنه وانت طيب
بسنــــــــــــت صلاح,,,
ردحذفكل سنة وانتي طيوووبة ورمضان كريم عليكي وعلى الامة الاسلامية اجمعين
حلوو بوستك جدا لانه محفز فعلا لمشااكل كتير
عارفة موضوع العصبية فكرني بايه باعلان كارير في الصيام في رمضااان
ربنا يجعل رمضان زيادة لمقامك علوو ,,,:)
وربنا يتقبل منك عملك وتغيرك في بوستاتك ان شاء الله
يااااه ايه الجمال ما شاء الله الله يفتح عليكى
ردحذفاحنا كبرنا لقينا ماما بتستقبل رمضان بدموع الفرح وتودعه بدموع الحزن على فراقه كنا صغيرين مش فاهمين ولما كبرنا فهمنا فهمنا فرحه لقا رمضان وفرحةالصيام ودموع عينيها ان ربنا يتقبل منها الصيام ده ويتفبل اعمالها فيه وبقينا زيها كده بالظبط وكمان كانت بتقول البركة اللى فى الشهر ده مفيش زيها فى اى شهر تانى كله خير
ربنا يبلغنا رمضان ويتقبل مننا جميعا يارب ويستجب دعائنا فيه يارب ويساعدنا ويقوينا على الطاعات
سلمتى اختى وسلمت يمينك
بسنت صلاح الدين
ردحذفكل عام وانتى بألف خير انتى والاسرة أجمعين .
موضوعك جميل ومتميز ، جزاكي الله خيراً .
تقبل الله منا ومنكي ، وان شاء الله رمضان القادم يحقق الله لكي احلامك .
كل عام وانتى نصيرة النساء ونصيرة لدين الله .
محمد البنا
طريق النجاح
am fopa'd
ردحذفو انتى طيبه يا حبيبتى و يارب يحققلك كل ما تتمنيه فى شهره الكريم ،اه يابنتى موضوع العصبيه ده رمضان برىء منه لكن نعمل ايه بقى تلاقى مليون خناقه فى الشارع و الناس ماسكه فى رقبه بعض و يقولولك اصلنا صايمين ،طيب ده الصيام اولى به ان نترك الجدال و الصوت العالى ،ونبقى مسلمين بجد مسالمين و رحماء، انا بشكرك اوى على دعواتك الجميله و يارب يبلغنا رمضان انا وانتى و المسلمين اجمعين و يتقبل صيامنا و صلاتنا
مامه مازن
ردحذفحبيبه قلبى و رفيقتى فى الكفاح التدوينى هههههههه،رمضان ده شهر من الجنه والله الحمد لله الذى اصطفانا و اطال فى اعمارنا لكى نبلغه ،و رمضان ده ليه مذاق خاص عندى بقى اول رمضان معاكوا طبعا و اول رمضان ومعايا خطيبى يعنى الحمد لله الحبايب كلهم متجمعين ،يارب يحققلك كل ما تتمنيه و يفرحك بأولادك و زوجك و يكون رمضان ده البشرى و السعاده ليكى و لسائر المسلمين
محمد البنا
ردحذفنورتنى و كل عام وانت بخير و صحه و يارب ان شاء الله يبلغك رمضان و تكون من عتقاء الرحمن فى الشهر الكريم
دمت فى تقدم و تألق
ايوة كدا هو دا الكلام ودا التفكير الصح للبوستات فكرة رائعة وياريت فعلا الناس تبطل تدخين ونقدر نسيطر على نفسنا ونعيش حياة رمضانية بجد نعيش بتعاليم دينا والله عمرنا ماهنخسر لو عملنا كدا دايما متميزة فى افكارك
ردحذفوان شاء الله ربنا يقدرنا ونساعد بعض على التقوى وكل سنة وانتى طيب ويااااااااارب ايام خير وسعادة وفرح عليكى وعلى كل المسلمين
كل سنة وانتي طيبة يا بسنت :))
ردحذفرمضان كريم علينا وعلى كل المسلمين :)
اولا
ردحذفكل سنة وانتي طيبة يا بسنت وربنا يعيده علينا وعليكي بالخير ويغفرلنا ببركته يا رب
كل الكلام اللي قلتيه صح و الواحد يقدر يعمله طبعا لو كان عنده ارداة .. وهو فعلا القصد من الشهر الكريم هو نربي نفسنا عالصح
لا هو شهر اكل ولا مسلسلات و يكون الواحد عصبي كأنو بمن عالناس انو صايم !
ومعلومة انو نقص السكر هو سبب العصبية اول مرة اعرفه .. شكرا عالمعلومة
تحياتي يا قمر
جهد رائع وصحيح بوست مفيد
ردحذفبارك اللة فيكى
وجعلة فى ميزان اعمالك
رمضان كريم
manoo
ردحذفياريت كلنا نجتمع على هدف واحد وهو اننا نخلى رمضان السنه دى ان شاء الله فرصتنا للتخلص من العادات السيئه،كل اللى ليه اخ و قريب و صديق ينصحه ويشجعه و ان شاء الله ربنا يجعله فى ميزان حسناتنا، ربنا يكرمك و يتقبل صيامك و قيامك ويعود عليك الايام بخير انت و سائر المسلمين
كل سنه وانتوا طيبين
ميسره
ردحذفكل سنه و انت بخير و صحه وسعاده و يارب دايما فى تقدم
همسه
ردحذفو انتى طيبه يا قمر و بصحه و سعاده رمضان كريم،عندك حق الحقيقه احنا كتير استغلينا رمضان اسوأ استخدام من حيث المسلسلات اللى مبتخلصش مع انها بتتعاد تانى بعد رمضان و الاكل الكتير ،لكن الحمد لله ربنا كريم و امهلنا الى رمضان جديد ربنا يقدرنا و نستفيد و ننشر الفائده فيه ان شاء الله
كل سنه وانتى طيبه
احمد عبد السلام
ردحذفاول زياره و ان شاء الله متكونش اخر مره،نورتنى و كل عام وانت بخير
السلام عليكم ورحمة الله وبركاته
ردحذفاولا كل سنه وحضرتك طيبه
ثانيا جميل اقترحاتك ومشتقين لنعرف ايه ممكن نرميه بلا رجعه فى صندوق الزباله
تقبلى مرورى
صدفه جميله
ردحذفو عليكم السلام ورحمه الله وبركاته،و كل عام وانت بخير و سعاده،عاوزين نرمى كل حاجه غلط العصبيه، الاكل الكتير والزياده فى الوزن، التدخين ،كل ده رمضان جاى يخلصنا منه،نورتنى بزيارتك
كلامك ممتاز جدا يا بسنت و فى محله و فى وقته
ردحذفكل سنة و انت و الأسرة الكريمة طيبين و بخير
معلش أنا هاتوقف فترة رمضان و استكمل بعده إن شاء الله
هتوحشينى الشوية دول
:)
ربنا يتقبل منا و منكم صالح الأعمال إن شاء الله
و أتمنى تذكرينى فى صالح دعائك
رمضان كريم
د/نهى
ردحذفكل سنه وانتى طيبه و بخير و سعاده انتى و كل احبابك يارب ،ان شاء الله صيام و قيام مقبول و نشوفك على خير بعد رمضان ان شاء الله ،دعواتك لينا
رمضان كريم