كله يجمع عندى

انا جايه اطلب منكم طلب و يارب متكسفونيش

و هى خدمه عظيمه و ان شاء الله ربنا يجازيكم عنها خير

و من منطلق ان مدونتى تهدف فى المقام الاول

الى تشجيع المرأه على تحقيق الذات و النجاح

انا بعرض عليكم نموذج هايل لفتاه طموحه

اعرفكم عليها

هى : شيماء إسماعيل عباس

باحثة بالماجستير بقسم المكتبات والوثائق وتقنيات المعلومات

بكلية الآداب - جامعة القاهرة

شيماء تعد رسالة ماجستير عن" المدونات المصرية على الشبكة العنكبوتية العالمية مصدراُ للمعلومات: دراسة تحليلية"

تحت إشراف الأستاذة الدكتورة "يسرية عبد الحليم زايد" أستاذ المكتبات والمعلومات بالقسم.

و محتاجه الى دعمكم من خلال الاجابه على استقصاء عن المدونون و مدوناتهم

عاوزه اقولكم ان شيماء اتعرضت لسرقه فكره رسالتها اكتر من مره

لأنها قامت بنشر مخطط بحث لرسالتها في شكل دراسة علمية بإحدى الدوريات الإلكترونية المحكمة

و محتاجه ليكم عشان تثبت حقها و تقدم رسالتها للمناقشه

خلونا نساعدها و نبقى كلنا جزء من تحقيق حلمها الرائع

انا سبقتكم و الموضوع فى غايه السهوله

و مش هاياخد من وقتكم كتير

مجموعه اسئله بسيطه

لكن مع شيماء هاتفرق كتيييير

ده الايميل بتاعها

shimoo_771@yahoo.com

كله حالا يبعتلها رساله يطلب منها الاستقصاء

و عندى امل كبير فى اصحاب القلم الجاد و الهادف

انهم يساعدوها و يقدموا لها العون و الدعم

و شكرا.......

اول حلقه

اولا كل واحد ياخد حته تورته بمناسبه عيد ميلادى ال23

و خلوا بالكوا ان السنه الجايه و اللى بعدها ....و اللى بعدها

ان شاء الله لو ليا عمر هايفضل 23

انا بنبه اهو و عملت اللى عليا

معلش اتأخرت عليكوا و بشكر كل اللى سألوا عليا فى غيابى

زى ماوعدتكوا النهارده اول حلقه من جوه دماغه ... وجوه دماغها

مع هبه ورامى ابطالنا و يارب ينتفع بيها الجميع ان شاء الله

هبه ورامى لسه فى سنه اولى جواز وواحده واحده معانا

هايتعرفوا على بعض و على اختلافتهم

و هانعرف معاهم ازاى نبعد عن المشاكل بقدر الامكان

و تكون اختلافتنا سبب للتقريب بيننا مش للبعد لاقدر الله

بسم الله الرحمن الرحيم

هبه

اخيرا هانتجمع مع العيله من جديد

اول مره من اول ماتجوزنا انا ورامى نخرج مع عيلتنا كلنا

و احس انى و هو بقالنا حياه مستقله

مش عارفه ليه اختاروا مكان بعيد عشان يعملولنا حفله يستقبلونا بيها

بعد مارجعنا من شهر العسل

فرصه بقى واحنا لسه لوحدنا ارغى مع رامى شويه فى موضوع شغلى

هبه : ايه رأيك يا حبيبى انا شايفه بقى ان وقت الدلع خلص ولازم نفكر فى حياتنا بقى شويه

انا بفكر انزل اشوف شغل من تانى عشان مازهقش من قعده البيت وكمان اساعد شويه فى المصاريف

رامى ساكت ومركز فى السواقه

هبه : ايه يا حبيبى انت مش بترد ليه، لو مش موافق قوللى طيب و نتناقش

يا رامى

رامى بعد سكوت طويل : نعم يا هبه

هبه : ده انت مش معايا خالص اللى واخد عقلك ، بقولك عاوزه انزل اشتغل

رامى : بعدين طيب نبقى نتكلم بعدين وهو ده وقته

هبه: و ايه يعنى يا حبيبى وانت يعنى بتعمل ايه ماحنا من ساعه ماطلعنا و انت ساكت

انت زعلان من حاجه و مخبى عليا؟؟؟

رد عليا

رامى: مش زعلان ياستى مفيش حاجه اسكتى بقى شويه

هبه

هو في ايه هو بيعمل معايا كده ليه هو انا قلت حاجه

و بعدين هو ماله عمال يلف فى نفس المكان ليه كده

ده احنا بقالنا اكتر من ساعتين فى طريق ماياخدش اكتر من ساعه

لما اشغل الراديو يسلينى

رامى :اقفلى يا هبه البتاع ده مش عاوز ازعاج

هبه :سيبه يارامى انا زهقانه هو مضايقك فى ايه

رامى بيقفل الراديو و يقول : قوللى حاضر و خلاص

هبه

ايه الخروجه الرخمه دى

هبه :رامى انت وقفت ليه؟؟

رامى : مش عارف شكلى تهت

هبه : طيب استنى لما نسأل حد

رامى : لا مش ضرورى انا عارف المكان بس اتلخبطت

هبه :وماله طيب لما نسأل عشان نتأكد

رامى : لا مش لازم خلاص

هبه : طيب اصبر هاكلم حد من العيله اوصفلهم احنا فين ويقولولنا نوصل ازاى

رامى : هو انتى ليه مش بتسمعى الكلام قلتلك انا عارف ملكيش دعوه بقولك ايه نامى و لما نوصل هاصحيكى

هبه..... جوه دماغها

انا غلطانه اصلا انا بس كنت عاوزه اساعده

عشان ميتضايقش مش عارفه ليه مش طايق كلامى

مع انى كنت عاوزه اسليه و احسسه انى بشاركه

و انى مش متضايقه اننا تايهين

رامى .... جوه دماغه

مش عارف ليه مش مخليانى اركز فى حاجه

و بعدين نسأل حد ليه مانا عارف كل حاجه

هى ليه محسسانى انى مش عارف اتصرف

و انى مستنى مساعده عشان اعمل ابسط الحاجات

خلاويص

انتوا عارفين ايه النقطه هنا اللى كانت غايبه عن هبه

ان معظم الرجاله لما بينشغلوا فى حاجه

زى السواقه مثلا و حاجات تانيه كتير بيدوا كل اهتمامهم للى فى ايديهم

عشان كده مش بيركزوا فى اى حاجه تانيه جانبيه

حتى و ان كان مجرد كلام

بعكس الستات اللى بيقدروا يركزوا فى كذا حاجه مع بعض

فمثلا بنلاقيها فى المطبخ بتعمل كذا حاجه

فى وقت واحد وعينيها مع الاولاد كمان

وعشان كده اختارى الوقت المناسب للكلام

و خصوصا اذا كان الموضوع مهم ومحتاج مناقشه

الحاجه التانيه ان الراجل زى ما شفنا مش بيحب انك تحسسيه

انه مش قادر ينجز ابسط الامور و انه دايما محتاج مساعده

بلاش الاهتمام الزائد خصوصا وقت المشاكل

لأن ده بيفسره الراجل على انه غير جدير بتحمل المسئوليه

على عكس مانتى تقصدى طبعا وهو انك بتشاركيه وتقدميله دعم

المره الجايه لما تكونوا مثلا تايهين فى الطريق

اقفلى الراديو عشان يركز و متتكلميش

و سيبيه وهو هايحلها بمعرفته فى دقايق

و ده طبعا بينطبقى على مواقف كتير فى حياتنا

و دى كانت اختلافات النهارده

يارب تعجبكوا

انتظرونااااااااا

كل سنه وانتم بألف خير

يارب نكون من عتقاء الله فى رمضان

و ان شاء الله يكون ربنا تقبل منى ومنكم

عيد سعيد بقى عليا و عليكم ان شاء االله

و كل اللى ليه امنيه ربنا يكرمه بيها

بفضل الله و ايامه المباركه

معلش غبت عنكم بس عذرى .....

انى فضلت اقضى رمضان السنه دى مع الله

و بس.......

زى ماوعدتكوا بالتغيير و بموضوعات و نيولوك

هاوفى بوعدى

عشان كده...........

انتظرونى ان شاء الله بعد العيد

بسلسله جوه دماغه ....و جوه دماغها

حلقات هاندخل بيها جوه دماغ الرجل و المرأه

مع ابطالنا هبه و رامى.....

و بما اننا متفقين ان المختلف يتجاذب

بس ساعات الاختلاف بيكون سبب مشاكل

لأن كل واحد فينا ليه طبيعه عقليه و قاموس خاص بيه

هانحاول نفهم الطرف الاخر

و اسباب ردات فعل كتييييييره بتدهشنا و تصدمنا فى بعض الاوقات

و صدقونى بعد مانقرب لطريقه تفكير الرجل و المرأه

هاتندهشوا من التغيير اللى هايطرأ على حياتكم

لو اتبعتم النصائح ....و فهمتوا مشاعر الطرف الاخر

لا و كماااااااان.............

هاتعرفوا طعم السعاده اللى غابت عنكم مع ايقاع الحياه السريع و الجاف

مستنياكم بعد العيد ان شاء الله................

فتافيت رمضانيه

كل سنه وانتوا طيبين

جيت اقول كلمتين زى ماوعدتكوا

هاتكلم عن فتافيت صغنتوته رمضانيه

اول فتفوته و انا معتبراه انه اعلان و تعهد فى نفس الوقت

و بمناسبه انى فتحت التليفزيون لقيت

خير اللهم اجعله خير

فوق التلاتين مسلسل

فأنا قررت و الله المستعان

انى .....انى ......

انى مش هاتفرج على اى حاجه فى رمضان

و عندى سنه طويله بعد رمضان اتفرج على راحتى

و اشترى نفسى من ربنا لعل و عسى يكون نصيبى العتق من النار

تانى فتفوته حبيباتى نساء العالم

ودعى وقفه المطبخ لساعات ووفرى وقت ومجهود

و هانحضر ان شاء الله كل الاكل قبل رمضان

و نشيله فى التلاجه و نطلعه للطبخ يوم بيوم

يعنى باميه متقمعه ، ملوخيه متخرطه.......و الخ الخ الخ

تالت فتفوته لحبايبى الاطفال

السنه دى نشجع اولادنا على الصيام

زى مابنجيب فى رأس السنه الشجره و نزينها و بابا نويل.......

السنه دى هانعمل شجره رمضان

نجيب شجره و نزينها بالفوانيس الصغيره اللى على شكل ميداليات

ودى منتشره و هاتلاقيها فى كل مكان

و كمان نعمل جدول الصيام و نكتب اسامى الاطفال فى ورقه

و قصادها ايام الاسبوع و فترات الظهر و العصر و المغرب

و اللى يصوم لحد الظهر ليه هديه

و اللى يصوم لحد العصر هديه اكبر

و هكذا اللى يصوم للمغرب

دى طريقه جميله للتشجيع على الصيام

لأن الاطفال بيحبوا التنافس فى كل شىء

فنستغله فى شىء هادف يفهمهم دينهم

و الطريقه دى نستخدمها فى الصلاه و قراءه سور من القرأن

ان شاء الله تبقى نتيجه ناجحه و الاولاد يفرحوا و يستفادوا

رابع فتفوته خاصه بالعزومات

و اتيكيت العزومه اللى يتماشى مع رمضان

لازم يكون على السفره سلطه و شوربه دى مهمه جدا و خصوصا فى رمضان

و معاها كوب للعصير و كوب للمياه لكل ضيف

و نكون محضرين التمر على ترابيزه بجانب السفره

لأن طبعا فى ناس تحب تبدأ الفطور بتمر سنه عن نبينا

خلى بالك ان لازم يكون فى نوعين من السلطه على السفره

السلطه الخضرا و اى نوع تانى معاها

كمان لازم الاكل يكون متناسق

يعنى لو عزومه لحوم و طيور

مينفعش تقدمى سمك

لكن لو عزومه سى فود ممكن تقدمى طبق اضافى عباره عن لحوم

عشان لو فى ضيف مش بياكل الاسماك

و طبعا من المستحب ان تعرفى الاكلات المفضله لضيوفك

عشان تتجنبى المفاجأت

لحد هنا اقولكوا سلام و كل سنه وانتوا طيبين

عاوزين تخلصوا من ال.....؟؟؟؟

كل سنه وانتوا طيبين

و قبل رمضان والانشغال فى العبادات و العزومات

عاوزه اقولكوا كام حاجه كده

اولا و نظرا لقدوم الشهر الكريم

فأنا قررت انى ارحمكم من البوستات اياها

و هانتكلم عن شهرنا الكريم و الاستعداد ليه

و قد ايه هو فرصه حلوه عشان نصلح بيها

حاجات كتير غلط فى حياتنا

و كمان بعد رمضان و العيد الكريم

ان شاء الله هاتلاقوا مواضيع جديده و بوستات

تهم و تناسب كل الزوار الكرام من الجنسين

يعنى هانعمل نيولوك جديد للمدونه

و خلونا نبدأ بإسم الله

السنه دى بقى غير كل سنه يالا نعمل أجنده لرمضان

خطوه خطوه هانصلح من نفسنا

هانجيب سله مهملات ونخلص من كل مشاكلنا

اولا........

العصبيه اللى بتعم على الاجواء الصياميه طوووووول النهار

و خصوصا للرجاله و اللى بيشتغلوا الصبح كتير

فطبعا بيبقوا مش طايقين نفسهم

احب اقولهم اننا هانتخلص بقى من عصبيتنا

بطريقه جديده

الخبراء بيقولوا ان نقص السكر فى الجسم

هو السبب فى اضطرابات الاعصاب و ضيق الخلق

عشان كده و سنه عن نبينا هاناكل كميه مناسبه من التمر

على الافطار عشان يريح معدتنا و على السحور عشان يريح اعصابنا فى النهار

ثانيا..........

هانبعد عن الزيوت الكتير فى الاطعمه المقليه

و التوابل و المياه الغازيه و القهوه

و نبدلها بالخضروات و المياه و العصائر عشان نتخلص من عسر الهضم و زياده الكوليسترول

و اهم حاجه يا جماعه المياه لأنها مهمه فى حاجتين

بتزود الطاقه وبتظبط ضغط الدم و بتقضى على الضعف العام

و مهمتها التانيه انها مفيده جدا للجلد لأنها بتساعده على التخلص من كل مشاكله

ثالثا.........

الناس اللى عاوزه تخس

فرصتها كبيره فى رمضان على عكس ما يتخيله البعض

هناكل كل حاجه بس بكميات قليله

هانقلل فى الزيت و السمنه و احنا بنطبخ

هناكل خضروات كتيييير اوى

و نستبدل القطايف و الحلويات الشرقيه على قدر الامكان بالفواكه و العصائر الطبيعيه

رابعا..........

ودى مهمه اوى يا جماعه بالله عليكوا

نبطل بقى التدخين

السنه دى ان شاء الله

هانصوم اربعه عشر ساعه

يعنى اكتر من نص يوم

معقول مش هانبقى عندنا اراده نستحمل العشر ساعات اللى باقيين

و منهم كذا ساعه ضايعين فى النوم

بلاش بس تقول مش هاقدر

انوى بس و استعين بالله و قول ان شاء الله هاحاول

و ربنا هايعينك ان شاء الله

بس انت اشرب مياه كتير و عصير ليمون

و لازم دش بارد الصبح و قبل النوم

و كل ماتجيلك رغبه فى انك تشرب سيجاره اعمل اى حاجه تشغل نفسك بيها

قوم صلى ركعتين

قوم كل اى حاجه بتحبها

اخرج و خد نفس عميق و اعمل رياضه مشى او جرى

و على فكره رمضان فرصه عشان انت اصلا هاتبقى مشغول بالعزومات

و الزيارات و الاهل و الاصحاب و الصلاه و قراءه القرأن

كفايه عليكوا كده النهارده

البوست اللى جاى هانشوف ازاى نخلى جو البيت كله رمضان

و شويه افكار لتنظيم العزومات

على كام طريقه نوفر بيهم الوقت اللى بيضيع فى المطبخ

على فكره حلوه بقى لأحبابنا الاطفال نشجعهم بيها على الصيام

اترككم فى رعايه الله

كل سنه وانتوا بألف خير

اللى ليه حق ياخده

من منطلق ان اقصر طريق للمطالبه بالحقوق هو الاعتراف بحقوق الغير اولا

و زى ماقلت ما للمرأه انا جايه النهارده عشان اقول ما عليها

و خاصه تجاه زوجها

هاتكلم عن حقوق الزوج

اول حق ..............

الطاعه

زى ماكنتى بتطيعى والدك ووالدتك وانتى فى بيت اهلك

لازم تطيعى زوجك يمكن اكثر من طاعه الوالدين كمان الا فى ما حرم الله طبعا

بس عاوزين طاعه عن حب مش عن خوف

تطيعيه عشان بتحبيه و هو اغلى حاجه عندك

عشان هو حبيبك وزوجك و ابو اطفالك

و اخوكى و ابوكى و صديقك و سندك فى الحياه

اخضعى له ليس خضوع ذل بل خضوع عشق

بكده طعم الطاعه هايبقى احلى كتييير

ثانى حق................

احفظيه فى ماله

احفظيه فى ماله يا حواء مش تبعثرى كل ماله

على الكوافير ومحلات اللبس و حاجات زايده عن الحاجه

زوجك ائتمنك على ماله عشان تصرفى على البيت

حافظى على الامانه و انفقى منه بالمعروف

ثالث حق...............

احفظيه فى عرضه

صونى عرضه و شرفه فى وجوده و غيابه

لا تدنسى حرمته بإيدك

بيته امانه فى عنقك

لا يدخله فى غيابه من لا يرغبه

حافظى على نفسك و على ثقته فيكى

من النظرات المسروقه اليكى

حتى النظره تجرحه فى غيابه

رابع حق.............

احفظيه فى اولاده

دى اعظم هديه هو اهدهالك

حافظى عليهم واهتمى بتربيتهم تربيه صالحه

تتباهوا بها فيما بعد

متتكلميش عنه بسوء امامهم

شجعيهم على احترامه و على حبه

اذكرى محاسنه امامهم

حسسيهم بحبك لوالدهم

عشان يعيشوا فى جو اسرى رقيق

خامس حق..........

كونى له زوجه وعشيقه و رفيقه و ام

طيعيه واهتمى بملابسه و اكله عشان تبقى زوجه ناجحه

تجملى و تزينى و كونى اجمل النساء فى حضرته

اسمعيه اجمل كلمات العشق و عودى لسانك الا ينطق الا بعذب الحديث عشان تكونى عشيقه مبهجه

اسمعيه و قفى الى جواره وقت شدته وشاركيه اسعد لحظات نجاحه عشان تكونى خير رفيقه

لمسه حنيه و اهتمامك باحواله و ان تعذريه و تصبرى عليه يجعلك اعظم ام

كونى له خير النساء كما قال رسول الله فى حديثه الشريف

( التي تسره إذا نظر إليها وتطيعه إذا أمر ولا تخالفه فيما يكره في نفسها ولا في ماله )

بطاعته و رضاه عنك صحيح هاتدخلى الجنه

ولكن انا عاوزه اقول ان مش كل زوج هو اللى جنتك رهن رضاه

الزوج الصالح اللى بيتقى الله فيكى بس

كل واحده النهارده انتى مدعوه ان تعيشى ليله تراضى وتصافى

مع زوجك

استقبليه بإبتسامه و وجه بشوش

انسى كل اللى الزعل

افتكرى كلمه واحده بس تقوليهاله

بحبك.....عشان انت اغلى الناس عندى

اللى لابسه بنطلون.....تقلعه

اوعوا حد يفهمنى غلط

مش انا اللى بقول دى الحكومه السودانيه اللى بتقول

و عشان تعرفوا اصل الحكايه تعالوا نرجع شويه سوا

ليوم كان عادى جدا فى حياه الصحفيه السودانيه لبنى احمد الحسين

كانت بتحضر فى امان الله حفل فنى اقامته بحضور لفيف من الاعلاميين

و فجأه وبدون مقدمات هجمت الشرطه على المكان

و قبضت على 12 فتاه تحت رايه الماده رقم 152

اللى موجوده فى كتب القانون تحت عنوان افعال فاضحه

الفعل الفاضح المقصود هنا هو ارتداء البنطلون

اه والنعمه .....تخيلوا

و العقوبه هى الجلد 40 جلده

الغريب ان الحكومه بتقول انها بتطبق الشريعه الاسلاميه

مع انى و الله ورسوله اعلم اعرف ان الجلد ده عقوبه الزنا

و عشان كده طبعا الفتيات اللى بينفذ عليهم هذا الحد

بيخرجوا مطأطئات الرأس لأن المجتمع لا يصدق ولن يصدق أن هذه البنت جلدت بسبب بنطلون

و طبعا العائله بتتبرىء من بنتها

و الى اخره من مهزله تعيشها الاف الفتيات فى السودان

الصحفيه السودانيه طبعت كروت دعوه للأعلاميين و الصحفيين لحضور مهرجان جلدها

لتسلط الضوء على القانون الجائر و مادته المزعومه

و طبعا لا تفوت حقوق الانسان ولا الامم المتحده مثل هذه الفرصه

فتدخلت و عرضت وقف الحكم على اعتبار ان الصحفيه من موظفيها الذين تسرى عليهم الحصانه

و لكن الصحفيه رفضت اى تدخل فى شئون بلادها

و تطوعت بأن تكون كبش فداء لكثير من الفتيات السودانيات

لعل و عسى يتراجع المشرع عن جريمته الشنيعه فى حق الفتاه

و يمحوا عنها وصمه العار التى تتركه اثار الجلد

و هاسيبكوا مع نص رساله الصحفيه التى تبعثها لكل من يهمه الأمر

سلام عليكم أيها الصديقات والأصدقاء،
أشكركم كثيرا وأود أن أعرب عن سعادتي بهذا التضامن، الذي أرجو أن يسلط الضوء على
المادة 152 من القانون الجنائي السوداني لسنة 1991م، ذلك أن قضيتي في بدايتها ليست
قضية استهداف شخصي لي أنا ككاتبة··· ولا هي تفلت عرضي من بعض أفراد شرطة النظام
العام·· كلا·· رغم أنها يمكن أن تتحول أو حولت بالفعل لتكون هكذا بعد أن اتخذت
القضية منحى آخر، هو دعوة الناس والعالمين ليكونوا شهودا على هذه الفضيحة ''فضيحتي
أم فضيحتهم'' ذلك ما ستحددونه أنتم بعد سماع أقوال الاتهام وشهوده وليس أقوالي أنا·
قضيتي هي قضية البنات العشرة اللواتي جلدن في ذات اليوم··· وهي قضية عشرات بل مئات
بل آلاف الفتيات اللواتي يجلدن يوميا وشهريا وسنويا في محاكم النظام العام بسبب
الملابس، ثم يخرجن مطأطئات الرأس لأن المجتمع لا يصدق ولن يصدق أن هذه البنت جلدت
في مجرد ملابس·· والنتيجة الحكم بالإعدام الاجتماعي لأسرة الفتاة وصدمة السكري أو
الضغط أو السكتة القلبية لوالدها وأمها، والحالة النفسية التي يمكن أن تصاب بها
الفتاة، ووصمة العار التي ستلحقها طوال عمرها·· كل هذا في بنطلون·· والقائمة تطول،
لأن المجتمع لا يصدق أنه من الممكن أن تجلد فتاة أو امراة في ''هدوم''· ولهذا طبعت
500 بطاقة دعوة ليحضر الناس والمتضامنون والأصدقاء والإخوان والشامتون أيضا·· إنها
دعوة عامة·· وكما ترون لم أسرد حتى الآن تفاصيل ما جرى·· تعمدت ذلك·· وحتى يسمع
الناس بآذانهم ويروا بأعينهم من أقوال الاتهام وشهوده·· وليس مني أنا· وإذا كانت
هناك ثمة أسئلة تدور حول لماذا يقبض على البعض ويترك البعض الآخر؟ فإن هذا سؤال
وجيه يمكن أن يطرح على الشرطة أو النيابة·· ولنرى ماذا يحكم الناس·· ولنرى ما هي
الأفعال الفاضحة ما ألبسه أنا ولبسته البنات اللواتي جلدن؟ أم هذه المهزلة التي
قاموا بها وتتكرر يوميا دون أن تجرؤ واحدة على الشكوى خوف الصدمة على والديها من
الفضيحة·· إذاً القضية هي المادة 152 التي تعاقب بالجلد 40 جلدة أو الغرامة أو
العقوبتين معا··· في موضوع الملابس الفاضحة دون أن تحدد ما هي مواصفات هذا الزي
الفاضح؟ وفوق ذلك اسم المادة في القانون ''أفعال فاضحة''، تخيلوا ماذا يمكن أن
يتبادر إلى الذهن حين تسمع أن فلانة بنت علان جلدت في النظام العام بسبب أفعال
فاضحة؟ هذا ما أردت أن أشهد الناس عليه·· وليسمعوا من الاتهام وشهوده·· أما أنا فلن
أقول يوم المحكمة سوى ''نعم''، ''هكذا صحيح '' ولنرى ما هي الجريمة·· جريمتي التي
ارتكبت؟

لبنى أحمد حسين الخرطوم / السودان

عاوزه من ده يا حزومبل

تحديث هام يا جماعه بره الموضوع بس ارجو الاهتمام

قناه الايطاليه تجرى استطلاع من الذى انتهك حقوق الانسان فى غزه؟؟؟

1- اسرائيل بأستعمال القنابل الفسفوريه

2-حماس بأستخدامها البشر كدروع بشريه

3-الاثنان

4- لا احد

الى الان نسبه التصويت على رقم 2 طبعا 88%

ارجو اننا ندخل كلنا و نصوت على رقم واحد دى فرصتك عشان تعمل حاجه من اجل غزه

ده الرابط
http://www.sondaggi.rai.it/index.php?sid=39195&lang=it

بتحب مراتك؟؟؟

طيب فكرت تساعدها فى البيت؟؟؟

لو سألت السؤال ده لأغلب الرجاله الشرقيين طبعا

هايقولوا لا طبعا هو فى راجل بيعمل شغل البيت

مع ان ده مش بينقص من الرجوله فى شىء

بالعكس هى الحنيه و الرفق بالزوجه مش رجوله برضه ولا ايه؟؟

مش قصدى يعنى تقوم تمسح وتغسل و تطبخ

مع انى اعرف ان فيه رجاله كتير اكلهم احلى من الستات ميه مره

بس فكرت مره وهى مشغوله فى المطبخ تقوم تعرض عليها

ولو من باب عزومه المراكبيه تعمل مثلا طبق السلطه

طيب فكرت لما تخلص اكل تساعدها و تشيل معاها الاطباق

ولا بتقوم و تسيبلها الدنيا وما فيها

و تجرى على التليفزيون

لما بتبقى تعبانه و مش قادره تقوم بأعمالها اليوميه

بتكوى لنفسك قميص ولا بتقعد على الكنبه

وفى ايدك الريموت و تبدأ طلباتك

عاوز كوبايه مايه

عاوز شاى

تعالى شغليلى التكييف بالمره بقى

جربت مره تشجع الاولاد و تقولهم يالا يا ولاد نرتب البيت لماما عشان تعبانه النهارده

ولا بترجع من الشغل ترمى هدومك فى حته و الشراب فى حته وهى وراك تجرى تلم الكركبه

تفتكر لو عرضت عليها اى مساعده ولو بالكلام كده هاتنقص رجولتك و تقل فى نظرها؟؟

لا بالعكس دى منتهى الرجوله و هاتشيلهالك كمان انك حسيت بيها و بالمجهود اللى بتعمله

جربت تذاكر للأولاد او تلاعب البيبى الصغير على ما مراتك

ترتاح شويه و تهتم بنفسها و ترجع حبيبه زمان

ولا بتقعد تنتقد فى شكلها ومنظرها و خلاص

لو مش بتعمل كده او كده

شكرتها طيب على اكله عملتها او على هدومك اللى اتغسلت و اتكوت و بقت اخر فل و عشره

حسستها ان تعبها مرحش على الفاضى و ان فى حد بيقدر

كل كلمه حلوه او لفته طيبه منك هاتخليها تعمل زياده بس عشان ترضيك

انا عن نفسى شفت بعينى محدش قالى

راجل مراته كانت تعبانه شويتين

عمل هو و الاولاد حمله نظافه على البيت

هنا مكنسه وهنا ممسحه وهو فى المطبخ عملها احلى اكله

راجل زى ده بقى مراته بعد ماتقوم بالسلامه تهمله

ولا تبوس التراب اللى بيمشى عليه

زى مابتدى زى مابتاخد

داين تدان

و بعيد بقى عن مجتمعنا الشرقى ونفخته الكدابه

انتوا عارفين ان مساعدتك لأهل بيتك سنه؟؟؟

اه والله شوفوا الحديث ده

إعانة الرجل زوجته في أعمال المنزل من إحسان العشرة ومن مكارم الأخلاق التي سنّها لنا رسول الله صلى الله عليه وسلم، فقد روى البخاريّ في صحيحه قال:

أنه سَأَل عَائِشَةَ، مَا كَانَ النَّبِىُّ صلى الله عليه وسلم يَصْنَعُ فِى الْبَيْتِ ؟ قَالَتْ: كَانَ يَكُونُ فِى مِهْنَةِ أَهْلِهِ ، فَإِذَا سَمِعَ الأذَانَ خَرَجَ .

كذاك قالت : يخيط ثوبه ويخصف نعله ويعمل ما يعمل الرجال في بيوتهم

و لنا فى رسول الله اسوه حسنه

طيب انتوا عارفين بقى ان فى الاسلام و الله و رسوله اعلم طبعا

عمل الزوجه فى المنزل تكرم و ليس الزام؟؟

و ان الرجل يجب ان يكون شاكر لها خدمته

تعالوا نشوف خليفه المسلمين عمر بن الخطاب قال ايه

الخليفة الثاني عمر بن الخطاب جاءه رجل يوما ليشتكى إليه من زوجته ، فلما وصل وجد عمر في بيته وصوت زوجته مرتفع عليه .؟فلما خرج قال له أنا يا أمير جئت اشتكي لك من زوجتي لقيت زوجتك أعظم قال له : تغسل ثوبي ، تكنس بيتي ، تربي أطفالي ، أفلا نصبر على بعض أذاها

على فكره الكلام هنا مش بس على الزوجه لا يا جماعه على الام كمان

الشباب اللى مش بيساعدوا امهاتهم

ياما تعبت و شالت و عملت عشانك

اوعى لما تكبر تزيد همها و تعبها

ده حقها عليك انك تريحها و ترعاها وتخدمها

يمكن فى الزوجه قلنا نساعد بس

انما مع امك لا هاتخدمها مش بس مساعده

و اخيرا الحب مش بس بالكلام يا جماعه

عاوزين شويه حنيه واهتمام و مراعاه كمان

انا خلصت بقى

يارب يكون كلامى خفيف عليكوا

هو الكام بكام؟؟؟

معادله من صغرى وانا نفسى احلها و الاقيلها نهايه ،رغم اكتمال اطرافها لكنها ناقصه حاجه

الكام عربى =بكام اجنبى

دورت كتير على اللى ناقص لقيت ان اللى ناقص الكرامه

و ده فضل ناقص الى وقتنا هذا ،عشان كده المعادله عمرها ماهتكمل

كان نفسى تكمل بأستشهاد دكتوره مروه رحمه الله عليها

لكن للأسف من بيده الأمر عزف عن الكلام

و تركنى بلا اجابه و ترك المعادله بلا حل

و بقت الحكايه اصعب من امتحان الفيزياء بتاع ثانويه عامه

استغربت وانا بشوف البنى ادم العربى بيتبهدل فى الغرب

و بلده مديره له ظهرها و عامله فيها عبده العبيط

هى كرامته مش من كرامتك

هى مش لما ابنك يتهان تبقى دى اهانه ليكى

هو مش المثل بيقول اللى ليه ضهر مينضربش على بطنه

ده احنا انضربنا لما اتهرينا لحد لما مابقاش باينلنا ضهر من بطن

و لو كلب اجنبى مش هاقول بنى ادم اتهان كانت بلده

اقامت الدنيا ولم تقعدها

بس يا خساره

احنا بنى ادمين

و حقوق الانسان مش سامعين صوتها الجهورى

ياترى لو كنا تبادلنا الادوار كانت التزمت صمتها المشين ده برضه ؟؟

و اعتقد انه قد حان الوقت ان تغير اسمها من حقوق الانسان

الى حقوق الانسان الغربى

معلش بس عشان نبقى على نور

و الغلابه اللى زينا ميفتكروش انها ممكن تتهور و تدافع عنهم

كان نفسى اسمع حتى التنديد والشجب و الاعتراض كالعاده

و لكن حتى دول كانوا خساره فينا

اللهم ارحمها و اسكنها فسيح جناتك مع الشهداء و الابرار

و صبر اهلها و اخلفهم خيرا فى مصيبتهم

انما محدش قاللى بقى......

هو الكام بكام؟؟؟؟؟؟؟؟؟؟؟؟؟

كلاكيت....تاج تانى مره

احب اولا اهنى اصدقائى ولو انهم اكتر من اخواتى واقولهم الف مبروك على نجاحهم فى تمهيدى ماجستير

بكليه الاثار جامعه القاهره

بجد رفعتوا راسنا و فخوره بيكوا اوى

عشان حققتوا حلم كان فى خيالى

النهارده بس حسيت انه اتحقق

عشان انا وانتوا واحد

وطول عمرنا نجاحنا و فرحتنا بنقسمها على اربعه

بالتوفيق يا احلى دكاتره ان شاء الله

شدوا حيلكوا يابنات

عقبالى ،انتم السابقون ونحن اللاحقون بأذن الله

ثانيا بقى نيجى لحبيبتى مامه مازن باشكرها على التاج الرائع ده

و اسفه اذا كنت اجلته يا قمر بس زى ماقلتلك

موضوع الاحلام ده كان محتاج وقفه مع النفس بقى

اسمحولى انا بدلت التاج المرصع بتاج اجمل تحيه منى لأخواتى

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

الحقيقه انا مش بتمنى اغير حاجه فى الماضى بحلوه ومره

لأن زى مافى معلم فى المدرسه

كانت الحياه بتعلمنا بطريقتها الخاصه

و كل تفصيله هى اللى ساعدتنى انى ابقى ما انا عليه اليوم

احلامى كانت.......

• 
  
  
  حلمت ان اجعل عائلتى و بالتحديد ابى فخور بى و الحمد لله على ما اظن وفقنى الله فى ان يعيش هذه اللحظه





• 
  
  
  حلمت ان اشكر الله على ما اعطانى عمليا و ان كنت اعلم انى مقصره ولكنى حاولت ان اعطى غيرى جزء ضئيل مما من الله على به





• 
  
  
  حلمت بالأمان ولقيته معاك .....انت عارف نفسك طبعا





• 
  
  
  حلمت انى اترك اثر فى الحياه ولا امر عليها مرور الكرام و مازال قيد التحقيق





• 
  
  
  حلمت بالمدينه الفاضله ولم اجدها و مازلت احلم
• 
  
  

أذكر خمس أحلام على الأقل ..تخص مستقبلك ؟؟؟

• 
  
  
  نفسى ربنا يكون راضى عنى انا عارفه انى بكون ضعيفه ساعات بس نفسى يقوينى



• 
  
  
  نفسى ربنا يجمعنى معاك فى بيتنا عن قريب وابقى زوجه صالحه و يكون بيتى جنه و اخليك اسعد زوج فى الدنيا...برضه هوعارف نفسه



• 
  
  
  نفسى ابقى ام، عندى اولاد اربيهم كويس و اشوفهم بيصلوا جمبى ،و ابقى امهم وصاحبتهم



• 
  
  
  نفسى استغل منحه الله لى لتحقيق شىء يكون سبب فى رضاه عنى



• 
  
  
  نفسى اعمل ماجيستير ودكتوراه كمان



• 
  
  
  نفسى ربنا يمهلنى الوقت لكى ارضى اقرب الناس ليا ولا يرحلوا او ارحل انا الا وهم راضيين عنى وعارفين انى حبيتهم اوى

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن؟

• 
  
  
  خطيبى،بس راضيه ومقتنعه ان ربنا قدر لنا ان نتقابل فى الوقت المناسب،مش مهم قابلته امتى الاهم انى قابلته



• 
  
  
  اصدقاء قريبين الى قلبى



• 
  
  
  عائلتى الثانيه



• 
  
  
  وناس زيكم مشجعنى على الاستمرار

- أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..

• 
  
  
  جدى الله يرحمه كان نبع حنان و طيبه ،و لكن احمد الله على ان ابى ربنا يطولى فى عمره ورث منه كل هذا



• 
  
  
  عمتى الله يرحمها كان نفسى تشوفنى وانا عروسه وتشوف اولادى



• 
  
  
  صديقه عزيزه رحلت عن الحياه كان نفسى تكون موجوده وسطنا لكن هى مش بتغيب عننا ابدا لأنها فى قلوبنا، و يكفى ان حتى فى غيبتها مجمعانا مع بعض

و اخيرا ادعولى ان ربنا يحققلى احلامى التى لا يعلمها غيره

التاج ده صعب اوى فى وجهه نظرى لأن الحياه بتاخدنا فى دوامتها و بننسى احلامنا

عشان كده اعتبرته جاى فى وقته عشان يفكرنا، و اللى ليه حلم تاه عنه

يدور عليه يتشبث بيه و يحاول يحققه

وعلى كل من يسمع اسمه او حتى مايسمعوش يعمل كشف احلام فورا

ونعتبرها دعوه للبحث جوانا عن احلام بها تسعد حياتنا

استاذ عمرو "حبشتكنات فلسفيه"

ميسره "زوبعه"

نونا "بلاش فضايح"

جنه

طريق النجاح

تحت الياسمينه

منمنمات نادره

طوبه فضه وطوبه ذهب

شمس النهار

الجواز وسنينه

حلم

كاتب مصرى "كأنى اتكلم"

هيثم الكاشف "فى دقيقتين"

همسه

مانوووو

يارب ماكونش نسيت حد ولو نسيت انا بقول اهو الدعوه عاااااااااااااامه

و اعتبروها فرصه عشان نلحق قبل فوات الاوان نحقق ولو شىء مما نتمناه

الموضوع ده ....مش بتاعى خالص

من فتره وتحديدا بعد مانشرت موضوع ربنا مايجبش قهر زارنى احد المدونين الافاضل معلقا بأن الموضوع جميل رغم اعتراضه و لكنه لم يذكر اوجه اعتراضه و دعانى لرؤيه مقال منقول عن د/محمد مهدى استشارى طب النفس يتكلم فيه عن سيكولوجيه المرأه....وحبيت اشاركم بيه ،اصلى بصراحه اعترضت على كلام كتير اوى فيه فقلت تشوفوه معايا يمكن اكون انا منحازه للمرأه و ده افسد عليا الحكم العادل على الامور اللى عاوز يشوف الموضوع كامل موجود على مدونه رحيق

احب انوه عن ان الكلام المكتوب باللون الاحمر مقتبس عن المقال مش كلامى

نيجى بقى للب الموضوع يقول الدكتور و اسمحولى انى انقل الاجزاء اللى اعترضت عليها:

هو بدايه فيه مقدمه عن اللغز المحير و الفتاك ،المخلوق و السر المسمى بالمرأه كأننا حاجه كده من الفضاء الخارجى،و شرح الدكتور الخواص الجسديه و ماتتعرض له المرأه من تغيرات و اعراض فرضها الله عليها عزوجل بأسلوب وجدته صريح زياده عن اللزوم،لكن اللى صدمنى انه ارجع التستر و الحياء عند المرأه لسبب عجيب غريب الا وهو انها حين تصل المرأة إلى سن الشيخوخة أو قريب منها تظهر الترهلات و التجاعيد بشكل أكثر وضوحا مما يظهر في الرجل .و كرد فعل طبيعي لهذا الفضح البيولوجي تميل المرأة – السوية – إلى التخفي و التستر و ما الخجل الفطري لدي المرأة رغبة حقيقية في الابتعاد عن العيون الفاحصة المتأملة لتلك المظاهر البيولوجية الكاشفة و من هنا يبدو حجاب المرأة ملبيا لذها الاحتجاج الفطري النفسي للتسترو ربما تكون صفة التستر قناعا يخفي حقيقة المرأة البيولوجية و مشاعرها عن العيون و خاصة إذا بالغت المرأة في استخدامها

و ماكتفاش بس بوصف التستر لأخفاء غيوبها عن الناس لا وكمان ارجع سبب تجملها و اهتمامها بنفسها و وضع مساحيق التجميل و العطور لنفس السبب مش عارفه هو احنا جربانين ولا ايه

يتبع صفة التستر صفة أخرى تبدو مناقضة لها لكنها في الحقيقة مكملة إياها و هذه الصفة هي التظاهر فالمرأة لا تكتفي بالتستر و لكنها تريد أن تزين ظاهرها و تجمله ليتلهي به كل ناظر إليها فلا يستطيع التلصص إلى دخائلها بسهولة و من هذا نفهم ولع المرأة الفطري بأدوات الزينة و التجمل و استعمال الروائح العطرية و لا يتوقف التظاهر عند المستوي الجسدي أو المادي فقط و إنما يمتد إلى المستوي النفسي فيتمثل في ميل المرأة إلى الكذب المتجمل بمعني إنها تميل إلى إعطاء صورة افضل عن نفسها تخفي بها أشياء و تظهر أشياء و هي أن بالغت في عمليتي التستر و التظاهر تصبح خادعة و مخدوعة في نفس الوقت فهي تكون قادرة علي خداع الرجل بظاهرة ( المخالف كثيرا لباطنها ) و تكون أيضا مخدوعة لأنها بمبالغتها في لبس القناع تصبح بعيدة عن مشاعرها الحقيقية و عن ذاتها الأصلية فتصدق ما صنعته من وسائل التمويه .

و بعدين عاد وارجع سبب عواطف المرأه و احاسيسها انها خلقت كذلك لأرضاء الرجل و لكسب حبه و خوفا من بطشه

فقد خلقت بطبيعة جياشة لتكون مناسبة لمواكبة حاجات الأب و الزوج و الأبناء و هذه الطبيعة تتسم بالسيولة العاطفية و التي تتبدى في التغير السريع في المشاعر و في حرارة هذه المشاعر مقارنة بالرجل و هذه السيولة العاطفية يكمن خلفها تركيبات عصبية و إفراز هرمونية تجعلها قوة دافقة تخشى المرأة خطرها و لذلك تحاول جاهدة إخفاء جزء كبير من مشاعرها و ربما أظهرت مشاعر تبدو في الظاهر عكس مشاعرها الحقيقية فهي تحاول إخفاء حبها حتى لا تتورط في علاقات حرجة وتحاول إخفاء كرهها حتى لا تتعرض لغضب الرجل الذي تحتاج إلية و تخشى بطشه و هي التي خلقت لتتمنع و هي راغبة ( يتمنن و هن الراغبات )

انما كل اللى فات ده مقدور عليه الا اللى جاى ده كله كوم و ده كوم و بالبونت العريض عنوان التبعيه طبعا انا فتحت عيونى و انا بردد استر يارب و راح رازعنى كام كلمه شوفوا كده معايا

مهما تظاهرت المرأة بالقوة و مهما تزعمت الحركات النسائية فهي تشعر في أعماق أعماقها بان الرجل يعلوها و إنها تابعة له متعلقة في رقبته و الحركات النسائية نفسها تعتبر دليلا علي ذلك لان المرأة لو شعرت في قرارة نفسها بالمساواة الحقيقية بالرجل لما شغلت نفسها بالإلحاح ليل نهار بأنها ( مثل الرجل ).ويبدو أن هذه حقيقة لا تستطيع المداهنات الاجتماعية أو الإنسانية تجاهلها علي أي مستوي من المستويات.الطريف أن الرجال ثبت تفوقه علي المرأة في المجالات التي كان يعتقد أن المرأة سبق معرفة بها و سبق تخصص فيها .و المرأة السوية تعرف بداهة إنها متعلقة برقبة الرجل طوال مسيرة حياتها فقد عاشت طفولتها و صباها متعلقة برقبة أبيها أو أخيها و عاشت شبابها و نضجها متعلقة برقبة زوجها وعاشت بقية حياتها متعلقة برقبة ابنها و هكذا تشعر المرأة بمحورية دور الرجل سواء أحبتي أم كرهته .و كرد فعل نفسي لهذا الشعور العميق بالتحتية و التبعية نجد أن المرأة تميل إلى الدهاء و الحيلة لتفادي بطش الرجل و هي تلجا للأغراء بان تتزين و تتعرض للرجل و تنتظر سعيه إليها فان لم يكن ذلك كافيا لجأت إلى الإغواء بالتنبيه و الحيلة و الدلال فهي تسعي إلى تحريك إرادة الرجل نحو الفعل بمعني أن المرأة تملك الإرادة المحركة في حين يملك الرجل الإرادة الفاعلة و المرأة بوعيها الفطري بقوة الرجل تسعي لموازنة ذلك بجمال الأنوثة و هي تستطيع أن تصل من خلال جمال الأنوثة إلى قهر قوة الرجولة و بذلك تشعر أنها حققت مرادها و اكثر .و حين تفشل المرأة في أغار الرجل أو اغوائة أو حين ترفض حتمية التحتية و التبعية للرجل بسبب استرجالها أو المبالغة الرجل في الاستعلاء عليها فأنها تلجا للعناد و المخالفة و العصيان فهي بالعناد تثبت وجودها الذي استله الرجل بحماقته و الإطاحة به و هي بالعناد ترفض ضعفها الذي استغله الرجل لإذلالها بدلا من توظيفه لخدمة الحياة .و المرأة مثل أي تابع مولعة بالممنوعات و بما هو ليس كذلك فهي تبحث عن البديل لعلها تجد فيه الخلاص من التبعية للرجل و لعل أقدامها علي الآكل من الشجرة المحرمة يرمز لهذه الصفة الأصلية فيها .و المرأة حين تفشل في أغراء الرجل أو اغوائة و حين تفشل في مقاومة قوته بجمالها و حين تفشل في تحريك إرادته نحوها و حين تفشل في عناده و حين تفشل في اجتياز الخطوط الحمراء و الدخول في المناطق الممنوعة حين تفشل في كل هذه الوسائل لا تجد إمامها إلا الشكوى و الألم و التمارض و يحدث هذا حين يهمل الرجل المرأة أو حين تفقد المرأة جاذبيتها أثناء الحمل أو بعد الولادة أو حين بلوغ سن اليأس و هنا تكثر علامات الاستغاثة و نداءات القرب و طلب الاعتمادية السلبية لعل هذه الأشياء تكون شفيعة لها عند الرجل فيرق قلبه و يحتويها مرة أخرى ( سواء كان أبا لها أو زوجا أو ابنا ) .

انا فى حياتى مشفتش اجتماع لهذه الكلمات الصادمه من التبعيه و الدونيه و التحتيه و متعلقه فى رقبه الراجل و بتتمارض و بتتجمل و الاغواء و الدهاء والحيله انا حسيت انه بيتكلم عن الكائنات الطفيليه اللى بتعيش على فضلات جسم المضيف،فاكرينها دى بتاعت احياء ثانويه عامه،يعنى مش كلام على بنى ادم

لا وايه مركز كل كلامه على بتوع الحركات النسائيه و المطالبين بحريه المرأه بيهزأنى بالذوق يعنى بس على مين .....

و اللى مكفهوش اللى فات يجى يشوف اللى جاى و المصيبه الكبيره

إذا كانت صفة التبعية قد أغضبت بعض النساء فان الصفة الحالية حتما ستسعدهن أيما إسعاد فالمرأة تعلم في قرار نفسها أنها الوعاء الذي يحافظ علي بقاء النوع فهي منتجة للحياة بأذن ربها و راعية لها اقوي من الرجل و المرأة هي وعاء اللذة الجنسية التي أعطاها المحللون النفسيون مكتنة محورية في توجيه و تحريك السلوك و المرأة هي الوعاء العاطفي الذي يشعر الرجل معه بالسكينة و الراحة و المرأة تذكي روح التنافس بين الرجال طلبا للقوة التي توصل إلى قلبها أذن فالمرأة وعاء الحياة و وعاء البقاء و وعاء اللذة و وعاء العاطفة و السكن و وعاء القوة أي أن المرأة تضرب بجذورها في اعرق نوازع الحياة .

المرأه وعاء.....الله يكرمك يا شيخ و يسامحك

الحقيقه صاحب المدونه لم يكون رأى حتى ينشره وقالها صراحه ان المكتوب ليس رأيه الشخصى

بالمناسبه احب اشكره،و انوه عن مدونته مره تانيه يا جماعه مدونه رحيق

انا سايبالكوا انتوا المدونه قولوا رأيكوا براحتكوا المدونه بتاعتكوا و منجيلكوش فى حاجه وحشه

سلام

الراجل ده بيقول كلام زى الفل

بغض النظر متفق معاه ولا لآ

متفائل... متشائم مش مهم

الحقيقه اللى منقدرش ننكرها

ان الراجل اذهلنا بخطابه

حاجه كده صناعه امريكيه بعيدا عن الخطب الرنانه

و الشعارات اللى مش بتأكل عيش

فى ايجاز و اختصار

بدأبالثناء و الاعتراف بفضل الاسلام

حدد نقاط الخلاف

عرض المشاكل

و سرد الحقائق

اوجد حلول

و عندما ظننا كلنا انه انتهى من الملف السياسى بأكمله

اطل علينا بلفته جميله تهمنى انا شخصيا كأمراه

اتكلم عن حريه المرأه و حقها فى المساواه والتعليم

و انه لاسبيل لنهضه الامم بدون المراه المتعلمه المثقفه
و عن اهميه دخولها المجال السياسى و كل مجالات الحياه

مع احترامه الشديد لمن تتخذ من الحياه الاسريه طريقا تسلكه بعيدا عن العمل

لكن طبعا ده لا يمنع انها تتلقى تعليم جيد لكى تنشىء جيل مثقف وواع

هنا قلت باعلى صوتى الراجل ده بيقول كلام زى الفل

ربنا مايجبش قهر

لو سألت حد تعرف القهر النفسى؟عمرك حسيت بيه؟ هايقولى قهر ايه ربنا مايجبش قهر ماحنا عايشين كويس و محدش يقدر يقهرنا

انما الحقيقه ان كلنا اتعرضنا للقهر النفسى رجاله وستات و دول كمان

القهر النفسى اشد كتير اوى من القهر الجسدى و العنف بأنواعه

اصلك لو اتعذبت او اتألمت ممكن تستمد منه القوه عشان تدافع و تحارب عن نفسك

انما لو روحك اصيبت فى مقتل و كبلتها القيود و الاغلال يبقى ازى الحال؟

قوتك الداخليه هاتختفى شيئا فشيئا

مش هاتقدرى تعيشى وهاتفقدى ابسط لذه فى الحياه و هى الشعور بيها

الكبت و قمع الرغبات و الاستهانه بقدراتك نوع من انواع القهر

ان يتم استغلال عواطفك و مشاعرك لتقيدك و ترغمك على الخضوع

وان يظل جلادك يسمم افكارك و يقنعك انك لا تستطيعى النجاح و انك لا تصلحى

و انك لست اهلا لها و ان حياتك بلا فائده

نوع من انواع القهر

ان يستهزىء بك الطرف الأخر و بكل ما له قيمه فى حياتك

ان يحرمك من تحقيق احلامك و طموحاتك و يعتبرها درب من الجنون و السفه

نوع من انواع القهر

مسلسل القهر ليس له الا طريق واحد

الأكتئاب و تبلد المشاعر

الا اذا........

تمردى....

ايوه تمردى

لكن مش التمرد بمعناه السلبى

اقصد التمرد على الواقع

التمرد على الضغط النفسى والعصبى

اكسرى القيود

ثورى و جربى ان تقولى ولو لمره لا

لا... محدش هايستهين بيا بعد اليوم

لا... انا استحق ان احيا و ان انجح

لا...محدش هايستغل عواطفى و مشاعرى كوسيله للضغط

لا...لن اكون مثل الدميه فى مسرح الحياه تحركنى الخيوط

سأقطع كل الخيوط و التقط زمام حياتى

لا...زى ما عليا واجبات انا ليا حقوق و بطالب بيها و ابسطها حقى فى حياه سعيده

اكسرى القيود و حطمى الحواجز ..لا تستسلمى

اقتلى خوفك وتحررى

ابحثى بداخلك عما يسعدك ،عما تتقنيه

ازيحى الغبار عن احلامك و طموحاتك وحققيها

ارضيتى كثير من الناس و قد جاء الوقت بأن تطلبى لنفسك و ان ترضيها كما نسيتيها

دندنى ابيات ام كلثوم

اعطنى حريتى اطلق يداى

انى اعطيت ما استبقيت شيئ

اه من قيدك ادمى معصمى

لم ابقيه وما ابقى علي

و اخيرا ارفعى رأسك عاليا و تحررى.....

انا لله وانا اليه راجعون

اللهم : ياحنان يامنان ياواسع الغفران اغفر له وارحمة وعافه واعف عنه واكرم نزله ووسع مدخله وأغسله بالماء والثلج والبرد ونقه من الذنوب والخطايا كما ينقى الثوب الأبيض من الدنس
اللهم : أبدله دارا خيرا من داره وأهلا خيرا من أهله وأدخله الجنة وأعذه من عذاب القبر ومن عذاب النار
اللهم : عامله بما انت اهله ولا تعامله بما هو أهله
اللهم : ان كان محسنا فزد فى حسناته وان كان مسيئا فتجاوز عن سيئاته
اللهم : أدخله الجنة من غير مناقشة حساب ولا سابقة عذاب
اللهم : انزله منزلا مباركا وانت خير المنزلين
اللهم : انزله منازل الصديقين والشهداء والصالحين وحسن أولئك رفيقا
اللهم : أجعل قبره روضة من رياض الجنة ولا تجعله حفرة من حفر النار
اللهم : أفسح له قبره ومد بصره وأفرش قبرة من فراش الجنة
اللهم : أعذه من عذاب القبر وجاف الأرض عن جنبيه
اللهم : أملأ قبره بالرضا والنور والفسحة والسرور
اللهم : قه السيئات ومن تق السيئات يومئذ فقد رحمته
اللهم : أغفر له فى المهديين واخلفه فى عقبة فى الغابرين واغفرلنا وله يا رب العالمين وأفسح له فى قبره ونور له فيه
اللهم : إن محمد فى ذمتك وحبل جوارك فقه من فتنة القبر وعذاب النار وانت أهل الوفاء والحق فأغفر له وارحمه إنك أنت الغفور الرحيم
للهم : اجعل عن يمينه نورا وعن شماله نورا ومن امامه نورا ومن فوقه نورا حتى تبعثه آمنا مطمئنا فى نور من نورك
اللهم اجعله فرطا" لأبويه وسلفا" وذخرا" وعظة واعتبارا" وشفيعا". وثقل به موازينهما وأفرغ الصبر على قلوبهما ولا تفتنهما بعده ولا تحرمهما أجره
امين... امين... امين

ابو العريف

مين فيكوا قابل ابو العريف؟،طبعا كلنا،ابوالعريف تلاقيه فى اى قعده ممكن يكون واحد صاحبك

دايما عامل نفسه فاهم فى كل حاجه و بيفتى فى كل حاجه، واول ماتفتح موضوع تلاقيه زى الكتكوت الفصيح

يقوم ويصيح ويبدع فى التأليف و يجيب كلمه من هنا و كلمه من هنا،و غالبا بيكون كلامه كله فى الباتنجان ،و مع ذلك تلاقيه بيكلمك بأقتناع رهيب ،و صعب تخليه يغير رأيه،

و رجاله كتير بيتبرعوا بأنهم يقوموا بدور ابو العريف خصوصا فيما يتعلق بالنساء

و اشهر جملتين بيفتوا فيهم كالتالى:

لما بتيجى سيره ابونا ادم وامنا حواء عليهما السلام

تلاقيه يتكلم بأسى ياعينى على ابونا ادم اللى مراته حرمته من الجنه

و حرمت معاها البشريه كلها

مستغل المقوله اللى بتقول عندما تحدث جريمه فتش عن المرأه

و اللى نفسى اعرفه هما بيجيبوا الكلام ده منين

و لاهو هجوم و انتقاد لمجرد التقليل من شأن المرأه

و وصمها بجريمه تخريب الكون، و ان الراجل هو اللى مهمته يعدل المايله

مع ان الله عز وجل قدر من قبل ان يسكن ادم وزوجه الجنه انهما خارجين منها لا محاله ليعمروا الأرض بدليل قوله تعالى فى كتابه العزيز

"سوره البَقَرَة آية رقم : 30قرآن كريم "وَإِذْ قَالَ رَبُّكَ لِلمَلائِكَةِ إِنِّي جَاعِلٌ فِي الأَرْضِ خَلِيفَةً قَالُوا أَتَجْعَلُ فِيهَا مَن يُّفْسِدُ فِيهَا وَيَسْفِكُ الدِّمَاءَ وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لا تَعْلَمُونَ"

و كمان الغريب ان لم يذكر فى القرأن من السبب فى الخروج ولكنها المعصيه لا غير

و كيف يذكر اول امرأه فى الكون بهذا السوء و يلحق بها تهمه هى بريئه منها و هو القرأن الكريم المنزه عن العنصريه و التلفيق

حيث قال عزوجل" فَوَسْوَسَ إِلَيْهِ الشَّيْطَانُ قَالَ يَا آَدَمُ هَلْ أَدُلُّكَ عَلَى شَجَرَةِ الْخُلْدِ وَمُلْكٍ لا يَبْلَى (120)فَأَكَلا مِنْهَا فَبَدَتْ لَهُمَا سَوْآَتُهُمَا وَطَفِقَا يَخْصِفَانِ عَلَيْهِمَا مِنْ وَرَقِ الْجَنَّةِوَعَصَى آَدَمُ رَبَّهُ فَغَوَى (121) ثُمَّ اجْتَبَاهُ رَبُّهُ فَتَابَ عَلَيْهِ وَهَدَى (122)"

سبحان الله واضح يعنى امنا حواء لم يكن لها اى دور فى مسأله الخروج ده غير انها اتبعت اوامر زوجها، و ان عصت فأنها لم تعصى منفرده ولم تحرض على المعصيه

يعنى اللى بيقول كده مش بس بيظلم المرأه عامه ،لا ده كمان بيفترى كذبا على السيده ام جميع البشر

و الادهى انه بيخالف القرأن

اما الحاجه التانيه اللى صاحبنا ابو العريف بيبدع فى شرحها

لما تلاقيه يقولك اه الستات دى متنفعش فى حاجه حتى الرسول قال كده

ايوه امال انتوا متعرفوش ولا ايه؟

ازاى متعرفوش استنوا بقى انتوا جيتوا للشخص المناسب مش الرسول عليه افضل الصلاه والسلام يا جماعه قال فى حديث شريف

(( النساء ناقصات عقل ودين ))

اهو انا جبت حاجه من عندى اهم ناقصات عقل ودين يعنى مش بيفكروا و مش متدينين

و الحقيقه ان ابو العريف هو اللى ناقص عقل بمعناها الصريح بدليل عدم فهمه و دين بدليل عدم محاولته حتى انه يفهم دينه صح

الحديث الشريف بعيد تمام البعد عن الاهانه التى لم نعتادها من رسولنا الكريم

الحديث طبعا فى جزء منه يدل على ذكاء المرأه مما يخالف تفسيرنا الخاطىء له

غندما قال الرسول الكريم" وما رأيت من ناقصاتِ عقلٍ ودين أغلبَ لذي لبٍّ مِنْكُن"

بمعنى ان تعجب الرسول صلى الله عليه وسلم من قدرات النساء، وأن الواحدة منهن تغلب ذا اللب أي الرجل الذكي جدًّا. فكيف تغلب ناقصة العقل رجلاً ذكيًّا جدًّا؟

الحديث يشير لحقائق علميه ودينيه بحته

و يقصد بنقصان العقل ان الله عز وجل جعل شهاده المرأه ملزمه وجود امرأتان لكى تذكر احداهما الأخرى

ليس لعيب فى صدقهما لا سمح الله

و لكن لأن المرأه تمر في حالات وتتعرض لتغيرات جسدية ونفسية تؤثر على طريقة تفكيرها. وهذا التأثير ينعكس على القرار الذي يمكن أن تتخذه المرأة. زد على ذلك ما تملكه المرأة من عواطف جياشة تفوق ما يملكه الرجل، وهذا عنصر لا يمكن إغفاله في العقل، ويمكن أن يؤثر بشكل واضح في القرار، طبعا لأن المرأه تفكر اكثر بقلبها و عاطفيه بخلاف الرجل

اما ناقصه دين و ذلك لأن الله فطرها بطبيعه خاصه تختلف عن الرجال و تحتم عليها انها تمتنع عن الصلاة والصيام

فى اوقات معينه

اخيرا لا املك غير انى احمد الله العظيم العادل الذى كرم المرأه و لم يترك مجال لكل سفيه انه يهينها و يقلل من قدرها

و افتخر بأنى ناقصه عقل ودين كما وصفنا رسول الله